جرح العراق زيدلي الانين بقلم عبد القادر الزيناتي

جرح العراق زيدلي الانين
والاولي ما طاب واسمها فلسطين
تراب الاثنين اعفرهن على راسي
واعجنهن تربة صلا بكربلا الحسين(ع)
وين الباهو وقالوا عرب احنه
وين الصاحوا احنه مسلمين
خل يرجع التاريخ ويشوف
هم تعود ايامك ياحطين
هم يعود ذي الفقار بيدك علي (ع)
يقطع ارقاب ارجال الكافرين
ويعود العدل باسمك عمر(رض)
وما تتعثر الشاة بحفرة لوتزلق بطين
وينك يا ابن الوليد المدمه بسهام
نصيح عليك صارنه كومه سنين
لو سعد ينهض ويشوف القادسية
كونكريت وفصلوا بيهن الصوبين
والقعقاع انكتم صوته من الصياح
رادوا يسكتوه بارقام وملايين
صرنا مثل المثل ماكال
يم حسين جنت بمحتل.... صرتي باثنين
يام حسين
لو صرختي المعتصم ما راح يسمع
اغاني كام يسمع من اشكال المطربين
لا تبكين حظك يا بغداد
حظنه فبلك ضيعوه ملوك وسلاطين
بسوق النخاسة انعرضنا
محد رادنا لابفلس ولا بفلسين
باكر دور منو للبيع معروض
من هسة السعر قدروه يا مسلمين
ترابك ثمين يا بغداد
ترابك ثمين يا فلسطين
بس النذالة بالاصل
والاصيل اصله متين
شجرة وجذور شبعانة
موالبطن بس شبعانة شبعانه هم العين
بطينك ما ينبت دغش
ولا دجلة ما جرفت وي الماي الغرين
ولا فراتك سمكاته اختفت
ولا خافت من فاله لوسكين
وشجرة ادم زوارها قلوا
والناصرية لعمارتنا ممشى سنين
وبصرة السياب ما غنت شعر
ولا ساحة العشار سهر بيها حنين
هم ترجع الايام ويعود العراق
مثل ما كان وتنعاد السنين
هم يرجع النواس يلم الحبايب
مي وخضار وجاي سنكين
والمتنبي بالكتب يصرخ حروف
ل اشكال الشعر وادب للدارسين
يمكن نرجع ونشوفه للجاحظ
وام كلثوم نسمعها يم عبد المعين ( صاحب مقهى ام كلثوم في العراق )
وزباله للشربت زبيب ( الحاج زبالة محل شربت زبيب مشهور في بغداد)
يوزع لرجعة الناس الطيبين
وللسيد كعك ما تلقه مثله ( اشهر محل كعك في بغداد ابا عن جد )
لا بموسكوا ولا بمريكا ولاالصين
وقف الحكي بحلكي
حلم صارت شوفتك
والحلم مرت عليه شهور وسنين
الزيناتي