احبتي اليوم اشارك معكم بقصيدة صوت الشمس للشاعر جبار رشيد
هذه القصيدة التي كان اسمها عنونا لمجموعة جبار رشيد الشعرية التي صدرت في الاسواق
عام 2006
****
صوت الشمس
كلمن باصله يعمل لازم إيعلموه
اهله اعله الوفه
وبالصبر يتحلّه…
* * * *
ويكَلوله الجفوف اطيح الفنجان
ومن جف الجمر
ماتوكَع الدله…
* * * *
التكَوده من اديه لتكَله انه امدليك
خاف ايمن عليك
ايكَوم يتبلــه
* * * *
اليكَلك جنت لتسمعه لمن جان
مومن الفعل
من الحجي تمله!!
سيفه البالحرب عصة متاع ايصير
زحمه بين اخوته
وبالشقه ايسله!!
* * * *
الحر حر الطبع لتغرك الأشكال
وميذل العبد
لو مارضع ذله…
لدّور نزاهه بروح مثل ابليس
اتكَلبه اشماتكَلبه
بكل طرف خلّه
* * * *
تره الطيب كَلب لوروحه دوله وجيش
والله بكلمه طيبه
بلحظه تحتــله!!
* * * *
وامشي اويَ اليحبك مثل ميماشيك
وبلحظة غضب
لا تحسب الزله..
* * * *
احسب باجرك لتكَول بس اليوم
اكَل الهذا هيج
وذاك ماكَلــه
* * * *
باجر بس ورق من يمشن الأقلام
وتبقه شخله هذا..
وهذا اله اشخله
* * * *
الماضاكَ العنب بالعزه ماخسران
وعمت عينه بمذله
التارس السّلــه
* * * *
لاتركض عبث والحلم بالتكوين
حلم الماوصــل
لتروح توصلــه…
* * * *
واخلف شورهم كَلهم خذيت الشور
العقل من غير شورك
غلــط تقبلّــه!!
* * * *
السمع صوت الشمس يندلهه تطلع وين
ودرب صوت الشمس
عميــان تندلـــه
* * * *
ولتظل تلتفت مره اعله هذا وذاك
وتشد لهذا راس
وذاك اله اتفلــه
* * * *
يم باب الصبح لتاني يطلع نور
لوتمشي بستر لو كَوة
تدخلّــــــه
* * * *
صوتك مو جذب لاتشتريله اجناح
وبلسان الصدك
للغيم يتعلّــه…
* * * *
انته البيك واضح بس عقول الناس
تريد ابجف غموض
الواضح تحلـــه
* * * *
ظل انته اعله حالك هذا حالك دوم
ضميرك بيه ملك
واعليك يتولّــه
* * * *
والبروحه جبل ميهمه من اتصير
تله وجوه رجله
من امده التلــه
* * * *
والمخلص العمر خطواته بالصعبات
ميتوسل شدد
بالصعبه تسهلّه…
* * * *
الشمع لو يبقه طافي الظلمه ماتكَضيه
شعل راسه بضوه
ويدري الضوه ايسلّه!!
* * * *
ولمن تشتعل لتكَول بيه النــــــار
واليسـألك اشلونك
تدري شتكَلــــه؟!
* * * *
كَله اهنانه ضلي وآنه ظل هناك
ونار اليشتعل
متين بضلــه
* * * *
وانته اتعلمت من يوم عشر اسنين
الوكت خيط المصايب
وانته تغزلّـــــه…
* * * *
ولأن ضايكَ تعبهه وشايف اللوعات
المصايب ماتهزك
بيهه تتسلّــــه!!
* * * *
يالمعاشر اشد اثنين للأنســــــــــان
اذا جلن عليــــه
يكَضن عليه كلـــه..
* * * *
العشكَ كض الفقر سولف عليك هواي
وكَََََلّه اشكَد تعب بس
ماتـــرك خــله!!
* * * *
ذنبك ماعفتهم ذنبك العافـــــوك
وانته بــلاذنب
بس للذنب صلّه
* * * *
كَلبك بيه حرب ميسكنه ياهو الجان
ظـل بس الكَدر
والماكَدر ولَـــه
* * * *
وجرحك مايفز الّه اعله صوت احباب
واذا ماصح محب
مايشتكي العلّه !!
م ن ق و ل
