بقلمي-{رد الغريب من الوطن}

بقلمي-{رد الغريب من الوطن}

{رد الغريب من الوطن}
....
رد الغريب
من الوطن
يازمن...؟
هذا الزمن
الوطن...
والشوك ...
والغربه....
واحد
أثنين
تلاثه
المجموع ياذيني
المجموع نار وتشب
محروگ أحس الگب
ياهو اليطفيني
الوطن
وصله صعب
والوطن مثل الام
والشوگ
سولت گلب
والشوگ حرگة دم
والغربه
فركة محب
والغربه نار وهم
أبين الثلاثه ضعت
ضاعت عناويني
كل يوم چادر أدگ
كل يوم...
يوگع سرح
كل يوم...
ينزف جرح
يوميه مأتم فرح
ياهو اليواسيني
...
بعد الدمع والصبر
وشوگ البعد والزعل
فجأه أجانا الفجر
فجأه الظلام أرتحل
وطلعت شمس ع الوطن
حاچيت روحي وگلت
خليني أرد للوطن
ولمن وصلت الوطن
محد متانيني
دورت....
عن ذاك الزمن
گلولي لتدور
عود آنا جايب خبر
عن الايام الراحت
محمل هدايه وصور
وشوگ السنين الفاتت
ولمن وصلت الدار
متغيره شفت الدار
شبت بگلبي النار
يادمعه طفيني
يادمعه أسنديني
صحت يادار...؟
يا أحباب
أدگ بالباب...
ماواحد يحاچيني
وأصيحن
ها .....يهل الوادم
وبس الصدى يناديني
چاوين أرحلو يادار
أترجاچ ...أخبريني
خلصت الدمع بالعين
خلص دمي بشرايني
جاوبني الصدى تعبان
سألت الناس والجيران
عن الاهل والاخوان
واحد گلي
بعمان.....
وواحد گلي
أبيران....
واحد گلي
كلي بأرض الشام
وواحد گلي
برفحه؟؟؟؟؟
يخلصون الشته بخيام
رديت بجدم حيران
وبس دمعي يواسيني
...
رحت يم دجله ..؟
يم دجله أودعها
سألت الروج والشاطى
وبس الموجه أسمعها
ومن بعد الوداع الطال
ودمع التون موال
گلها يدجله أرجوچ
بداعت مايچ الطيب
بداعت شعر أبو الطيب
باعت كل مراقدنه
بداعت كل مساجدنه
بداعت كل حضارتنه
بداعت ريحة العنبر
بداعت مايچ الاشگر
راجع ..راجع
راجع لاتلوميني
الناس البل وطن أحباب
لكن أهلي الغياب
حسبالي..حسبالي
يدجله ألگاچ
الگه الاهل
كل الاهل..
كلها وياچ
والگه دارنه
والگالي عنوان
والگه أيام عمري
البيها خلان..
لاأسمي ..
لگيته بدار
ولا رسمي
بقتله آثار
ولا حته...؟
عرفت اخبار
لاعنوان
لاجيران
چا شنهي الوطن
لوضاعت الخلان
وچا شنهي السكن
مابيه أهل وأخوان
وشنفع التراب ...
الماعرف طيني..؟
دخليني....
أرد يادجله خليني
ذبل كل الورد
أبدوحة أسنيني
لاشمعه
بقت باليل تظويلي
ولا راضي الفجر
يرحمني من ليلي
خليني ارد
يادجله خليني
يادجله الزمن
حظ يانصيب اليوم
ولعبت آخر بطاقه
وخسرت أسنيني
...
رد الغريب
من الوطن
يازمن...؟
هذا الزمن
....
كلمات
ناصر اسماعيل الموزاني