رساله الى كل مسؤول قد جاء لخدمة مصلحته الشخصيه فقط
ولايهمه عما يحصل في العراق والعراقيين
الشاعر نور البابلي
وجه شيطان وجهــــــك كل الايام...اوملاك اتصير انت ابشهر آذار
اوتصير العـــفه عندك والكرامات...ولاجـــــــنك رمز للعاهه والعار
نسيت اشصار بينه ابموسم الصيف...حتى افريـــزنه هم انكلب حار
نسيت الشته اشسوه ابدار الايــتام...رجف من الظلم مو برد هالدار
نسيت اشصار بينه ابقـــمة البــوك...يالبــــيهه اصرفت مليار مليار
اذا طـــائـــي اكــــول الـــكرم وازاك...اكــــرم مره شعبك كول خطار
أجانـب والعــــــرب لك شــــبعو اهنا...وابن هذا البلد شو كاعد ايجار
لا شغل اوعمل هالـــــكاعده النـــاس...اذن الغـــيهه عطلة واحد آيار
غشيم انت او اجــيت اوماكو ربــاط...مثل صايم مصلي او يلعب اقمار
ابشهر كانون وجـهك وجــه الاطفال...ابشهر نيسان وجهك ينكلب زار
شيل ال(سوف)من كـــل الخطــــابات...ملينه الجـــــــذب ملينه الاخبار
يوميه ابوفد وبــــدوله مرتـــــاح...ماشايف شفت وانت اعرف اشصار
عوف الكرسي يمعــــــود كرهنـــــاك...من تكـــــــــعد عليه اثبت لتندار
واجهه الحقيقه او شوف الاخطــــــاء...وانت اول خطأ مطلوب الف ثار
شنو ذنب الشعب ظـــــل دمه مـــــهدور...وانت انهدر يمك نفــــط الابار
تدري البصره من تغضب شنو ايـــــصير...تتـــــــحول جهنم وانتوا كفار
واذا الموصــــــل تثور ايصــــير زلزال...لان بيهم حميه اونخوه واصرار
اوياويلــــــــك بعــــد نــــذكر بقــــــاياك...من تفــــزع اويانه ارجال الانبار
نتـــــــحول مثلث كل الاطــــــــــــــياف...ابكرامتــــنه نعيش انموت احرار
اذا عنـــدك كرامه اوغــــيره واحساس...اذن عوف الحــــكم هذا اخر انذار
شعبك من هدء لاتعتـــــــــــــــــقد خاف...معروف الهدوء ايتبعه الاعصار
ابشرط ننتخبك احنه اونـــــبقه وياك...حــــــــــبر منريد دمك كون الاحبار
جا بس المواطن دمــــــــــــه مرخوص....اوبس دمك ثمين ابأغلى الاسعار
لترشح بعد عــــــــــوف الدعــــــــايات...كشــــفناهه الحقيقه اوكل الاسرار
عالمنصب اجيــت اورايد اتـــــــــــــبوك...نعم انـــت بكـــت لتـــــــقدم اعذار
شنو السويته خاطـــــــر كلشي منكول...تكول اعمـــار صح موجود الاعمار
وزارات اودوائر تنـــــــــــــــــبني ابساع...بس شعبك يولي اوعوفه محتار
الينتخبك بعد لاغــــــــــــــــــــــــيره لادين...اكو واحد يجيب البيته سمسار
ظلم منك شبعـــنه اوكافي تكـــــــــفير...الوطـــن صاير سميه او احنه عمار
