كتبت اسمك بكلبي والجروح احروف
اشلون انساك واسمك جرح ياذيني
شما تبعد ولك وتروح عني بعيد
احسن عمري راح وضاعن اسنيني
يا ورد البنفسج يا عطر قداح
يا صوت البلابل نغم يشجيني
يا نسمة هوه وتهب على بكيظ
يا شمس الضحى وبشهر تشريني
تمنيتك تمر بي ولو بالطيف
مو طال الغياب وناره تجويني
موعمري بغيابك كظه بس اهموم
ودمعاتي على خدي مرافكه ونيني
دبطل هالهجر وارحم بحال اهواك
صدك من تغيب الوحشه تغزيني
تعال وخلي كلبي بشوفتك مرتاح
يا نهر الفرح جا يمته ترويني
مو عمري خلص بس انتظار ولوم
وعلى ادروبك اناطر يمته تلفيني
جا شنهوا السبب كلي يبعد الروح
كطعت احبال ودنه البينك وبيني
جا شنهوا الجرى وغيرك هيج ابساع
ونسيت ايامنه البيه تناغيني
جا وين الوعد وين الحجي المعسول
وازهارك صفن اشواك تدميني
حسافه وداعتك عمري الخلص وياك
شتلتك بيدي حنطه اشعير تنطيني
لجن يا حسافه وياهه صرخه اه
بسهام الغدر كمت انت ترميني
مو انه سكيتك بيدي من عطشيت
ليش انت تريد العطش يعميني
بس انه اكلك روح الله وياك
وتدري بطيبتي تعمي سجاجيني
بس انه اظلن فوك كلش فوك
لان انه وفي والوفه يعليني
وتظل انت مثل ريشه بمهب الريح
شنو انت ولك حتى تلاويني
بس انه اكلك شنهو تالي اصير
تتمنى حرف تبقى بدواويني
يا غدار صدك ما الك تذكار
ولو كلبي يحن اكطع شرايني
ذهب صافي انه تدريني ما مغشوش
وشبه لماع انت وجاي تغريني
27/7/2012
