قصيده للشاعر عبد الكريم محمد الحسون بعنوان لا تظن انه ارتوي

لا تظن انه ارتوي بمايك بعد
صار مايك مالح وما ينشرب
ولا تظن انه على بابك بعد امر
يل بعت حبك لغيري بلا سبب
انه طلكتك وحكك بالثلاث
وخاف يرجع انه هددته الكلب
يا حسافه ظيعت عمري بهواك
ودكله نخلاتك ولا بيهن رطب
جنت اتمنه ولو لحظة الوصال
وجنت افرح لون موعده كرب
وهسه صدك ما اشوفنك غزال
كمت اشوفك ذيب وبعيونه غضب
يل بعتني وبالثمن مالي اشتريت
شبه صدك وانه تدريني ذهب
روح وافرح بيه مبروك الشراء
لان انت وياه من نفس الحسب
صدك اشجارك بعد فتره تموت
وتبقى كومه اكبالي انت من الحطب
مو جنت شلال اسقيك الزلال
وشفت مايي من شربته شكد عذب
ليش عفت بلا سبب هذا الدلال
وليش خليت الهوى بكلبك نضب
وليش طعنيت الهوى بسيف الظنون
ومن سموم الهجر خليته شرب
ليش كل هذا جرى منك ابساع
شنهو حبك هذا راواني العجب
شرد اوصفك انه كلي وشرد اكول
غير مجنون وعجز منك الطب
يا حسافه بيك انه توهميت
وما شفت منك ابد غير التعب
بعد ما اريدك ولا اريدن هواك
ونار شوكي هفتت وماكوا لهب
روح تتندم صدك انت من وراي
لان بعدي الواعدك صدك جذب
13/7/2012

ابدااع بارك الله بيك