قصيده سالوني عنك للشاعر عبد الكريم محمد الحسون

سالوني عنك كلت هذا اهواي
يل بيك العمر ما راحن اسنينه
ما اكدر اوصفك يل شغلت الروح
يل كلك حلو ما بيك أي شينه
يا بدر الليالي الغازلنه انجوم
صدك من تغيب الظلمه تغزينه
يا حلو المعاني واحلى كل الناس
يل وجهك كمر ويضوي اعلينه
يل اسمك حلو ويلعب على الشفات
بيه وداعتك تحلى محاجينه
يبو صوت العذب ونسمعه جنه انغام
ندكه على المريض ايبطل اونينه
يا شدة ورد وتشمها كل الناس
ما تذبل تظل اكبالنه زينه
حبيتك واحسن روحي جنها اطير
ملت من صبره اتكول جا وينه
احبنك واحسن روحي بيك اذوب
واتمنى اشوفن شنهوا تالينه
ولك صعبه احسها فركتي وياك
شصبر والهجر مو طالن اسنينه
تعال ارجوك مر بي ولو بالطيف
مو دمعي نشف وكلوب حركينه
يا كلبي ولك شنهو دكلي اشبيك
بس الالم نربح لون حبينه
مو احنه بصدك والله نحب الناس
ما جذبنه يوم وي الياحجينه
تعال وشوف كلبي شكثر شوك البيه
صدك بس محبتك احنه تعنينه
يا بلسم اجروحي النزفاها الشوك
صدك انه اطيبن لو تمر بينه
جا يمته اشوفك وافرح بملكاك
وكلك يله وفي لكلبي كل دينه

عبد الكريم/ 23/5/2012