بقلمي-ليش أخذته

{ ليش أخذته}
-----
------
ليش اخذته
كلشي اخذته---
حته گلبي--؟
ذاك گلبي ألّي يدور أعليك
برحيلك فگدته
ضيعيته
ودوريته
وما لگيته
وما لگيت حدود
شايل موطنك
لاوين شلته
ليش أخذته
----
دوريت وياي مكسب
وانه أودك
ونته ضدي
محترگ وبگلبي تلعب
حته ربحي
الچان عندي
بلا لعب عندك خسرته
ليش اخذته
-----
دروبك الچانت سفر
بالگلب ترحل
بليه روجات النهر
بشراع تندل
شبدلك---؟
شبدلك ما صرت تسأل
وانه أسال---
ليش گلبك ما سألته
ليش أخذته
-----
چنت نسمة طيب
وي وكت الغروب
ومثل ورد الرازقي
معطر الدروب
وك--أحاه--؟
ياعمبر أهلنه
ريحة المشخاب
وصلت للجنوب
وين كل طيبك تركته
ليش أخذته
-----
وك --احاه--؟
آه ---وآه
آه ياگلبي التركته
آه يا گلبي الكتلته
وين شفته
خاف ضيعت العرف
وبغربه عفته
ليش أخذته
-----
----كلمات
ناصر اسماعيل الموزاني

جميل جدا ... احسنت اخي العزيز على الكلام الرائع والاحساس الجميل تحياتي لك من القلب

قال الكروان شعرا

فأبهرتنا

دام صفاءك

وغناءك

أيها الكروان

لك ودي

تقبل مروري

د. السيد عبد الله سالم

المنوفية - مصر