قصيدة جمر شوكي للشاعر عبد الكريم محمد الحسون

جمر شوكي

من رحت ليلي بقى يمشي على عكازة اجروحي
وعيني ما تقبل تنام
وجمر شوكي يجوي بكليبي
واطفيه بدمع عيني..وصبرنه بكلام
وروحي ذبلت مثل شجره
عافها الماي وكطع حبل الغرام
وصارت ايامي بغيابك
مثل وحشة مكبره ....الناس موتى والضحك بيها حرام
وروحي تاهت تمشي بدروب الهوى
وهي تبجي وناح وياها الحمام
وعيوني تربى على الدرب....تنتظر جيتك
يلي جيتك مثل صبح العيد...جايب صوغته حب وسلام
ولك صرت بغيبتك مثل الشمع
ياكل ابروحه...لا ضوه ايفيده ولا حتى الظلام
يمتى ترجع لي واشوفك
يلي حسنك احلى من بدر التمام
ناس راحت ناس اجت
وانت ياوسفه بقيت اهناك...ما ترضى تجي ويه الاحلام
شنهي كلي .يمتى كيضك ينتهي
احنه مشتاقين لشتاك ...جايب وياه الغمام
ويمته يا قداح ترقص
ويه نسمات الصبح .....وينتشر عطرك يفوح على الانام​