قصيدة حبيتك للشاعر عبد الكريم محمد الخشالي
:4: حبيتك لان شفت الكلب يهواك ....مو بيدي الامر صدكني مو بيدي
افرح وانتعش لو مر علي طرواك......ويوم اللي اشوفك يعتبر عيدي
دشوف اسمك على لساني ابد ما طاح....يلعب عل الشفايف هو الوحيدي
صرت عيون اللي وبيها اشوف الناس.....احبن بيك واكره ولك كل ودي
صرت مقياس انت لفرحتي والاه.....تكرب تبتعد يتغيرن عندي
صدكني صرت كل شي الي بدنياي.....صيفي انت وشتاي وحري وبردي
وك صعبه الليالي وانت عني ابعيد.....اتحسر ودمعي يحفر بخدي
يمحلي حياتي ودنيتي بعيناي......مثل الهور يزهي ويحلى بالبردي
صرت انت نظر عيني ال اشوفن بيه....من تغيب شوفي للضوه يجدي
عليل انه بهواك وصرت انت ادواي.....ليل انهار اهذي وهم كمت اعدي
بسجن انه صرت وانت الي سجان .....فدوه ارجوك هدني وكسره لقيدي
ادور اعليك انه بروحي كمت الكاك ....كل هذا واشوفن موقفك ضدي
اصيرن غيم الك وامطر عليك بصيف.....ولا خليك تعطش ابد بوجودي
ولو انت نهر ويشح عليك الماي .....افيض انه واجيك بمايي وبزودي
اشتريتك انه صدكني بسواد العين ....ما بيعك لحد ما انزل بلحدي
مثل بلم المشله صار حبي وياك....بس انت التحركه وبيدك المردي
شتلتك ولك سباحه بشواطي الروح ...اداريك واخاف اعليك من مدي
لا تبعد ولك ردك اكبال العين .....ابقى اهنا يمي وعني لا تحدي
ولك كاع انه ديم وانت الي اغيوم ....اذا ما مطر غيمك خلى ايندي
خليت الكلب دهله وشتلتك بيه .....جا يمته احصدك وافرح بكدي
مدمن شوفتك والهج انه بطاريك.....ليش انت بعيد وما تجي لحدي
اصبر بالكلب والروح من اجفاك....مو صبري اخافن ينكلب ضدي
دكلي اشلون اروضك يا غزال البر ....اظل اركض وراك وانت بس تعدي
