علي سر ولغز ...الشاعر عبد الكريم محمد حسون الخشالي

علي سر ولغز
علي سر ولغز محد عرف بيه
بس اللة ورسولة عرفوا اجان
ميلادة عجيب وصار بالبيت
ولا قبله ولد بالكعبه انسان
ربه بحضن الرسول وعاش وياه
مثل ظله يتبعه وبيه ولهان
جبريل الوصي ينزل بالايات
وعلي ويه النبي يكتبله قران
قاتل من صغر سنه وحمل سيف
رد الشرك بيه وصار عنوان
فارس ما قتل بس اليلاكيه
ويحز بسيفه بس ابطال شجعان
خيبر ما كدر يفتحها ابطال
رسول الله فتحها بيد ابو حسين
وابن العامري النادى بالاحزاب
هل واحد يبارز يا مسلمين
سكتوا ما حجوا اخرسهم الخوف
حسبالك حجاله ويه ميتين
بس حيدر نهضله وكامله بساع
ومن شافه عمر رجفت الرجلين
هوه عليه بفقاره وذبه للكاع
وحز راسه وكطع منه الوريدين
علي بس هوة دافع عن الاسلام
وهو الشال بيده رايه الدين
علي علم وشجاعه وفضل وايمان
وعبد ربه بصدق واخلاص وايقين
على هذا اليجندل بالوغى ابطال
تشوفه بالصلاه دامع العينين
علي يفرح لون ما لكه جوعان
ويفرح لو اجه ودك بابه مسكين
علي صوت العداله الشبع الناس
ما يرضى تكون الناس صنفين
علي طلك الدنيا ثلث مرات
كرها وكلها يمي لا تكربين
علي قرأن هو ويمشي على الكاع
يطبق كل شي بيه بعزم مايلين
علي ما راد غير التقوى مقياس
ولا فضل قريب على البعيدين
علي وكفت بوحه كل الاشرار
وجمعوا كل قواهم يوم صفين
يطلبونه تراهم جانوا بثار
من قاتلهم وجانوا مشركين
علي يبقى رغم كل الجرى والصار
امام وتفتخر بيه الملايين
علي هو قسيم الجنه والنار
يقسم الناس يوم الحشر قسمين
قسم يبغض علي تلكاه بالنار
وقسم الجنه ذوله احنه الموالين

عبد الكريم محمد حسون