لا تلوم العراقي
شبيدك يا عراقي و حتى ما سويت ؟؟
اللايم يكول .. و الحجي تراه بشلن ينباع
شبيدك لمن جتفوا حتى الايد
و لسانك يكول و ما تستمع لسماع
عندك رجل .. بس بالرجل شتريد ؟؟
اتطير بيها ؟؟ الرجل صحبة و ما تخرب وية الكاع
عندك عقل .. و العقل عالة على اليفكرون
و النظر من يوم الولادة ما اله داع
شبيدك .. احاجي المايعذرون
يلومون و ما دروا حال الاسد من تجتمع لضباع
شبيدك .. اريد احجي و اريد الكل يفهمون
آخرة الجبل طايح لو خلخلوها الكاع
و آخرة الصكر مربوط عد صياد
و آخرة السفينة ابحر لو كطعوا لشراع
و احنا بنص نزيزة و ها بعدنا وكوف
رغم التموا علينا شباع و جياع
من كشمير اجونا و من وسط كابول
اعراب و عجم تنتخي لحكنا الضاع
عاثوا بارض عراقنا و كطعوا لركاب
واوية وية اليهودي و على العراقي سباع
و اولاد العمومة الما بيهم الا اللوم
شنحارب و اهلنا بلا خيم من دارهم ضاع
و شنحارب اذا الواحد عليه الفين
يتخيلون اكو عنتر و سوالف القعقاع
قضيتنا بأمر رب الجلالة الصاغها صوغ
ما تنحل ترة بطول اللحى و بالشارب الفلاع
و ما تتحرر ارض عراقنا لو زاد هاللوم
تتحرر لو صرنا واحد مو نصاص و رباع***منقول
