أمســــــــــــح رامــــــــك

منو بينه بصفنته المايحس بالشوگ
ليام الطفوله ايرجعه ويهزه
الخبز بي عافيه ولذه وتحس مبروك
أذا چف امك بتنورهه يخبزه
ألعند عمل بي للبشر أصلاح
شمتاني بعد ما يطلع يبرزه
البعظ منه أسف عدهم طبع مو زين
عالماشي عدل لازم يحط ركزه
الرزق موجود ألله ينزله بكل يوم
بس اعمالنه المو صالحه تحجزه
أكو بعظ البشر يا للأسف والله
تنسه الله وقدرته وتئمن بخرزه
ألمؤمن شجاع ويهزم الشيطان
والشيطان ابد ما يگدر يوزه
ولد صالح الرايد يدعي اله امنيموت
بحب حسين عقله يحاول يدرزه
بنادم من يموت وللگبر ينشال
غير العمل شنهو اليگدر يحرزه
بسجله حسين أسمك سجله بعاشور
ولك حافظ عليه لا أسمك يچزه
أمس للرام لطمياتهم دزيت
واليوم الغناء الرامك ادزه
ليش ادغيرت عن امس يبن الناس
مو چنت الصحيح بعقلك تفرزه
من ترسل مقاطع تدري شنهو يصير
چن نحر الحسين برامك تحزه
ما عز روحه تدري حسين لجل الدين
و رامك عالحسين امخبل تعزه
أمسح كل مقاطع فرح العباس
وبعين الي يسمع أوگف وبزه
الموبايل ابأيدك يلا افتحه بساع
وكل مقطع خبيث ادخل عليه چزه

خادم الحسين (ع) أن شاء الله
الشاعر
احسان القريشي