ألماكل حرام أعمه العيون يصير
ودروب النجاة بعينه مخفيه
والماكل حلال يشوف درب الله
لو من الولاده عيونه معميه
چفوف الحگ ابد ما تلوي شماصار
والباطل اچفوفه بسرعة ملويه
واذا رايد تقيس البشر بل مقياس
المهم أخلاقه لدغرك معانيه
لا تدخل مضيف وتحچي ويه البي
أذا شفت الدلال بنصه مچفيه
وعلى كل حرمه صدفه بدربك تلاگيك
غير اختك ابد لا تعقد النيه
لا تنسه أمس ودگلي أحنه اليوم
ومصايب كربلاء اليوم منسيه
چنت تلطم أمس وتواسي بالزهراء
ودموعك بخدك كلهه مبنيه
أهل البيت امس بل مئتم يحظرون
ولطمو عالحسين بذكر طاريه
زينب تحظر وتمسح دموع الناس
من محمد الصافي يهد نواعيه
والزهراء تحظر والحسن وحسين
لمن مله باسم يقره لطميه
بعد نار الحسين تنزل الدمعات
وعلى مصابه بعدهي الزهره مچويه
وبعد دم الرضيع اعله المهد موجود
وچفوف الگمر عالنهر مرميه
وبعد طفله بخيمهم دم اذنهه يسيل
لأن جرحو اذنهه الأجل ترچيه
وبعد راس الحسين اعله الطشت موجود
ورقيه اعله الطشت لساعة محنيه
وانته اليوم تسمع بالغناء شلون
وبعد دمعات سكنه بخدهه مثنيه
وانته اليوم تسمع بالغناء شلون
والاكبر عيونه الحلوه مطفيه
وانته اليوم تسمع بالغناء شلون
وامس لشام زينب مشت مسبيه
من تسمع غناء تزعل العباس
وروحك ما ترد للباري مرضيه
لا تسمع غناء وانعل الشيطان
تره والله العظيم الدنيه مگظيه
خادم الحسين (ع) ان شاء الله
الشاعر
احسان القريشي
