احب الرجل من يوصل اثمانين
عاشق عمره 80 سنة
شعر
عباس طريم
___اريزونا_____
احب الرجل من يوصل ثمانين
ويتغزل اذا صادف ابنيه
اتشوفه اتكول يمكن عمره عشرين
يعادل من شباب اليوم ميه
يلبس قاط بالتقسيط بالدين
المهم يطلع انيق وحلو زيه
كريم وينطي للحلاق مرتين
حتى ايطلعه متانق شويه
تهل من عنده انواع الرياحين
جميلة من العطور الفرنسيه
يتعمد يمر من النساوين
اوحده اتكل للخره .. شماله خيه
يحرك الهن احجابه شمال ويمين
ويروح اويجي ابحجة خويه
يمر بيهن يكل الهن ملاعين
ارحمولي القلب , اشعلتوا ابيه
يبصبص من تجي الحلوات, بالعين
بلجي اتحن محاسن , لو سنيه
اذا ضحكت وراهه ايروح للصين
وذا وصلت , ايرابط بالثنيه
يضطر ياكل التشريب بالدين
وما يسمح يكول احد , عليه
لا مانع يسافر صوب برلين
اذا كالوله تلكالك صبيه
اذا كالت صباح الخير, نرمين
يلزك , لو تجيه وتكرصه حيه
كلما ايشوف حلوه يكول امين
ياربي عساهه اتكون اليه
وكلما ايشوف كل الناس لاهين
وتصد عينه اعله حلوه ,ايكول هيه
يمشي امن الصبح مايدري لاوين
صياد ويفتش بالبريه
مرة اتشوفه يم اسواق تحسين
مرة ايذب شبج بالشالجيه
شحلاته ايسبح ابنص الدواوين
قناص ويراقب من ربيه
جلمة عمو عنده اتشين وتهين
وجلمة جدو طركاعه وبليه
يجرب كل طريق الزين والشين
وكل يوم اليجي ايطيح ابهبيه
اكل طكات لمن تعب , مسكين
وابد ما تاب لو غير الجيه
بيت جواد خلو بي نياشين
واخياطين من زهره وزكيه
ومن زينه وحبايبه دعوتين
وطلع منهه ابكفاله ابخمس ميه
منعوه يوصل الهم ال ياسين
وحلفوا من يجي ايسووه ضحيه
وبس طلعوا لكوه بين البساتين
وثار اعليه تفك من كل ثنيه
رجع شارد ايشدشد بالقياطين
فحطان ويدور على اميه
مرة امغططينه ابجيحة الطين
وكلهه اتصيح من سوده عليه
عنيد وراسه حار وابد ما يلين
والحب عنده عنوان وقضيه
اجته اكوامه من اولاد شاهين
واجه تهديد من فرحه وضويه
لليابان شردت منه نسرين
وتركت بيتهه وشلعت سنيه
محاصر ما طلع من بيته شهرين
ويغني الولف جيبوه اليه
محارب سوموراي ويحسب اللين
اداة الخايف الايده رخيه
مخطط حربي ويشبه استالين
ويؤمن بالنصر مية بالميه
ملت من شكاويه الدواوين
كل يوم اليمر كعده وشكيه
خمس افصول واتسجلت بالدين
واتاجلن بالعطوة البقيه
دعاوي اتقدمت ضده شكابين
وصلوهه الوزير الداخليه
وللريس جلال الناس شاكين
راحوا , قابلوه بالجادريه
وكال انشا الله اتطلعون راضين
سهله اهواي مو صعبه القضيه
وكللهم الريس انتو غالين
لكن ما اشوفن اي اذيه
بعده الرجل ما واصل التسعين
مراهق والجره اتحسبوه عليه
احبائي الشعب صيروا امفتحين
هذا الشاب يا وسفه ضحيه
اظن ياكل تمر حلاوي وتين
ويكسب طاقه جدا قويه
ابو السبعين شنهي وابو العشرين
ماكو اي فرق كلهم سويه
اذا جان الكلب ريان ويعين
هو ايصير عمره البالهويه
كل الناس يا ابنائي فانين
ويا محلاه ابو الروح النديه
اقنعهم الريس بالبراهين
وطلعوا بيد كل واحد هديه
والريس نعرفه ايميل للين
ويحمل روح طيبه وعراقيه
وظل صاحبنه كاعد بين نارين
نار اللوم والنار السريه
احتارت بي الوادم كالمجانين
وما ظل غير بس رب البريه
ينصحونه ويردون الجوارين
ويقنعهم ابتكتيك ورويه
يمشي ويلتفت يعرف معادين
ينطرونه ويبدل دوم زيه
اذا صادف بنات اهواي حلوين
راسا تنفتح عنده الشهيه
ويهجم كالاسد ويكول ماضين
الى حيث الحروب الجاهليه
مقاتل داخل انواع الميادين
ويعرف كل حفيرة وكل زويه
مثل هذا الرجل يستاهل العين
كلبه ارهيف وروحه طريه
رجل باصراره غيرهه الموازين
واظن يستاهل امن الكل تحيه
احب هذا الرجل واكره الخاوين
الواحدهم ايلولح بالوصيه
اكبور الهم امام العين بانين
اتشوفوهم اتشوفون المنيه
احبنه واصير من الموالين
وادافع عنه بسنوني وبديه
وذا امثاله اسميهم معاقين
اسميه ليث ابو الروح الابيه
الحياة اتريد وتحب الميامين
حتى اتظل مع الايام حيه
ندري انموت.. نعرف كلنه ماشين
لكن الحيا حلوه وزهيه
ولتصيرون لي كلكم محامين
ضد هذا الرجل يهل الحميه
لان البارحه , ومن صوت برلين
تزوج باتلر عن عمر ميه
شعر
عباس طريم
اريزونا
رد: احب الرجل من يوصل اثمانين
هاي موقصيده
تصلح تكون من المعلقات
هذا شايب لو طركَاعه
ههههههههههههههههههههههه
عاشت الانامل التي خطت هذا الابداع
تحياااااااااااااااااااااااااااتي
رد: احب الرجل من يوصل اثمانين
راااااائعه جداااا شاعرنا الغالي
فعلا قصيدة كبيرة كما قال اخي ابو حيدر
صح لسانك
وننتظر جديدك معنا بشوق ..
اخي الغالي
