يــــــــــــــــــــــردوغـــــــــــــــــــــــ ان

أحجيها بصراحه وكَول يردوغان
ندريبك عميل الصهيوأمريكان

ندريبك عميل وتحمل الاحقاد
والبانيه جدك ورثته الاحفاد
للفتنه نعرفك انته الهه استاد
كل حجيك سراب اتوهم العطشان

كل حجيك سراب ومانصدك بيه
والصدك كلامك خلهه ايرويه
تجتلون الجتيل وتالي تبجي اعليه
مفهومه السياسه انجانك حلمان

مفهومه السياسه واحنه بيهه ادره
وجار السوء نعرف مكره وغدره
ابو الحسنين هالشاهد ولك كَبره
ومن سور النجف لسه نشم دخان

سور النجف شاهد حقد ال سعود
ولكم اثر واضح للفتن موجود
حسبالك نسينه وجاي هسه اردود
متوارث حقدكم يااخس عدوان

متوارث حقدكم وحنه نعرف زين
وبدم العرب ينذال متورطين
روح ارضي اسيادك عوف لهله الدين
اوربا وربعهم ياحُكم عِلمان

اوربا ارضي الهم خل يعرفونك
وبذاك اتحاد الشوم خليهم يسجلونك
لحم لرمن يخايب لسه بسنونك
ماتسوى ابحلفهم ولك حفنه ادنان

حفنه ادنان ماتسوى وعليك اهواي
موش انته امس كَاطع عليه الماي
اذا عندك مراجل ولك مو وياي
تعرفني ودَليلي امسجله ابعنوان

تعرفني يباشا وتدري ياهو انه
انه البجه بالتاريخ عدوانه
انه الماسطه يوم عله جيرانه
بالعشرين تشهد حومة الميدان

بالعشرين شاهد يضل مكَواري
وضنك بالقضيه فاهم اوداري
ياهو القشمرك وتحوف بكتاري
حدر ايدي المخطط جانك وهمان

حدر ايدي المخطط واضح التمثيل
ويمريكا العلاقه رايده تعديل
وال سعود ندري منهم التمويل
عوفوها السوالف هاي ياغمان

عوف انته السوالف ولتهي بشعبك
يردوغان واضح عالحبل لعبك
الف جلاق تاليهه الشعب لبك
يم حسني العفن موجود خوش امجان


(بقلمي) وتحياتي 25/1/2012

كلام صحيح وأصفق لك بكل حراره اذا تكتب قصيده ثانيه ترد بعد للي رد على اردوغان وقله العراق تحت الوصايه الايرانيه والعراق ملك العراقيين وليس العوبه لكل من هب ودب

تحياتي لك وخالص تقديري

شكرا لك وللمرور العذب وسوف تشاهدين القصيده الثانيه
وانه خادم (بس انه عراقي)تحياتي

اشكر اخي العزيز
اني اعرف بيك عراقي ومن ريحه أهلنا الطيبين
وإنشاء الله ما يكون كلامي ضايق حضرتك

تقبل خالص احترامي

ممنون منكِ اخت نوره مروركِ اسعدني
تحياتي