قصيدة عراقية بلون الشوملى

i عالشوملي وعالشوملي عنت علي ديرة هلي

................

حنت من بعد الجفه وجفني بعدهم ماغفه

كوسر هلي ودار الوفه ابربعتهم الهم ينجلي

.................

خفي الجدم ياناكتي مشتاك روحي الديرتي

أمفارك وطالت غربتي وذاجر وليفي الاولي

.................

ليل الحنين اشمطوله للذاكر احبابه وهله

والما يحن الوله ماله شفيع او لا ولي

................

رديت لديار الربه والعشره واسنين الصبه

خليني اشم طرف العبه اتلكيني يمه وهلهلي

...............

ابعيني الدمعها مانشف تترادس اطيوف السلف

كل حلم بعيوني خطف ينكل محنتكم الي

...............

ماينسه كلب العاطفي وناره أبد ماتنطفي

كل دار يسلاها الوفي ودار الجهل ماتنسلي



للشاعر ناصر محسن الساري

تقبلوا تحياتي

مشكور اخي على الكلمات الجميلة
عاشت ايدك
تقبل مروري
اخوك سيرانو