شعر لرياض الوادي عن فوز المنتخب كلش رهيب مع التسجيل الصوتي !!!
عمي خلف الله عليكم سباع يهل الغيرة
وعمي خلف الله عليك فييرا
عمي خلف الله على نور العظيم
صدله طوبه گلت صبت باللحيم
غير ربك لطف بشعبة الكريم
چان شهرونه الجماعة شهيرة
وعمي خلف الله عليك فييرا
شفتو باللحظة الاخيرة..شلون چا صارت هدف
انا ابوي الحجي عنده..جلطة من يمه رجف
چان موتو العراق ..ونصها راحت للنجف
وچان عدنا الحجي طفة وهبط عنده امبيرة
وعمي خلف الله عليك فييرا
وين هذا الگال افوزن ...انا وي صحباني
گال اسجل عشرة يمكن ...واحد على الثاني
والله ذبحونه الجماعة بياسر الگحطاني
يالله وينك ما تسجل ..طلع بوخة شيرة
وعمي خلف الله عليك فييرا
شفتو جاسم من اجه لياسر گبل
هيچ لاحة شويه شو هذا انجطل
باگ كلش هوا منه ..يعني ياسر هم عطل
رجعاه يلعب مدافع ..لأن چفه ديرة
عمي خلف الله عليك فييرا
باسم رحيمة ويا حيدر ..ذوله ابطال الدفاع
خط دفاع الموت ذوله... الترتجف منه الگاع
يا شجاع الگابلاهم ..ينهزم هذا الشجاع
اللغز ذوله المحير.من صعب تفسيره
عمي خلف الله عليك فييرا
طول ويا كرار بيهم..طول يابو الموزمة
حيل رگصهم ترگص ..وانت ابن حامي الحمة
فرحت كل العراق ..الارض فرحت والسما
لأن شعب الغيرة احنا ..ومن صعب تغييرة
عمي خلف الله عليك فييرا
قصي وي هوار يركض..وابد ما لحظة تعب
هذا عباس ويا هيثم ..صالح البيهم لعب
ويونس بكلته العجيبة ..الفرحت كل الشعب
نسى كل هموم كلها..ونسى كل تفجيرة
وعمي خلف الله عليك فييرا
الناس يوم اللعبة گعدت ..بال12 يمكن ظبط
نست هم الغاز كله ..والتفخخ والنفط
ولو اول شوط متنا.وصعد عدنا احنا الضغط
المهم جتكم عقود وصعدت التسعيرة
عمي خلف الله عليك فييرا
رغم تفجير وتفخخ ..والبلد ما بيه امان
بكل مكان الناس رگصت ..ورگصو حتى المكان
وانا اتحدى مواطن ..ماشرب تحت اللسان
هيچ من طگها يونس براسه چن تفجيرة
عمي خلف الله عليك فييرا
ومن ركض مهدي كريم ...وغط عليهم چنه ذيب
شفت بس دريس يركض ..چنه هذا البيب بيب
واحنا هم نركض وراهم.. ننخى وينك يا مجيب
فرجنّا على العراق ..وفرح الديرة
عمي خلف اللعه علي فييرا
خو نشأت رگصاهم ..هيچ عالوحدة وربع
گام هيچ يخوط بيهم..داخو گباله الربع
والله لو عدنا امان..ومستقر عدنا الوضع
چان خلينا العراقي ..بالنجم تسعيره
والله خلف الله عليك فييرا
انتو شفتو فييرا لمن..خلصت اللعبة بچى
بقى صافن عالفريق..وكلمه وحده ما حچى
زلمة طاح البخت عنده ...والبخت وياه بچى
گال دوخني العراق..شلون شايل غيرة
عمي خلف الله عليك فييرا
الزلم مو لعبة لعبو ...چنها ساحة معركة
اي فريق اليجي يلعب..عالسريع نچكچكة
استرالي ويا كوري ..وي فريق المملكه
وياهو انكظة نغسله يحظر التأشيرة
عمي خلف اله عليك فييرا
وكما وعدتكم
واخيرا قد عثرت على التسجيل الصوتي للشاعر رياض الوادي لشعره خلف الله عليك فييرا
وتمت الحفلة في فندق الرشيد قبل حوالي عشرة ايام
واخيرا عثرت على التسجل من احد حضور الحفل
يعني هذة الصوت حصري جدا جدا
اكلب النت ومتلكاه بس علة هذة المنتدى
وتحياتي الكم وانتضرو المزيد
الملفات المرفقةhttp://www.mriraq.com@ كلمة ممنوعة @...attach/mp3.gifعمي خلف الله عليك فييرا.mp3 (1.07 ميجابايت, المشاهدات 2)
واتمنى ان تنال اعجابكم
وشكرا
