شموع خضر الياس كريم الجسار

جايكم ذبيت حزني على الحدود
وانه واحلامي الزغيره ضيوفكم
بعيني كل ابوابكم تنحسب باب
وكلكم بفد وجه عيني اتشوفكم
لا تكلي منين انه ابن العراق
والهويه الساني غنه حروفكم
اسمي اسمك اذا تسال واسم ابوي
وطن امنته ورحت بجفوفكم
باقي لمعه بدنيتي وشايلهه موج
شموع خضر الياس اضوي جروفكم
وانكسر مشعل لمن تغفه الزغار
واحترك حرمل وامن خوفكم
تشب كمرتكم واطوف على السطوح
كعبة الروح وفريضه اتطوفكم
وادفه تحت وسادكم ليلة امان
واعبر بشارة فرح بطيوفكم
فزز جروحي الصبح دم عالرصيف
وطيره بيضه اتصلي فوك انزوفكم
ردت اكظ الساني غلبتني الدموع
وحجت دمعه وعاتبت معروفكم
يالبجيتو حسين من يوم الطفوف
عاف دم نحره وبجه على طفوفكم
انت والارهاب والدنيه على اخوك
واحتلال الماكو ضنه ايعوفكم
وجار ضل بيكم يوفي ديون جار
واصبحت ياهو اليكوم ايحوفكم
تزحف ويزحف اخو منيشن باخوه
الرحت لوراح شيفيد زحوفكم
والعراق امجتف جتاف الاسير
غيركم ياهو اليحل مجتوفكم
واحد الدم والخساره على الثنين
والحمل كل ما ثكل بجتوفكم
ياهلي الدم ما يخلف غير دم
وياعتب يغسل جرح ملهوفكم
لموا كلمتكم ودمكم والسيوف
وخل يشوف النسه اشجان وكوفكم
متن يسند متن وكفه على الحدود
ولا غريب اليطب بين صفوفكم
جذب غير سيوفكم تحمي العراق
وجذب هوه ايريد غير سيوفكم


انتم البيكم تعب حتى الزمان
وخلص كل صبره وصبركم ما خلص
فيض دمكم روه كترين الدروب
وفيض حبكم زاد حب وما نكص
طحتوا بين سنون تجار الضروف
وبين كذابين صيادة فرص
بدل اثيابه واجانه بغير ثوب
ولكه اولاد الخايبه طيور بقفص
بشر بجنة كواغد صدكوه
وبشر بتقسيم جابوله مكص
لا وحق بغداد ينجاس العراق
جان ملك الموت باسم الموت غص
دمنه اغلى من النفط واليشتريه
ولا يكيف جار عالدمعه ركص
احنه صح الوان واديان ولغات
بس وطن واحد عزيز وما رخص
كلنه نبظ كلوبنه بكلمة عراق
بعد تنبظ بيش لو صارت حصص