اعادة نشر قصيدة الى الارهابيين والتكفيريين علي البهادلي
مهما طال الحقد ودمّر
والارهاب اعلينه اتوزّر
تفجير وتفخيخ وقتلى
واجساد ابكل حي تطشّر
ومهما طالت بينه المحنه
ومهما قاتم صار المنظرْ
ومهما رادونه انساومهم
نبقى انقاوم ما نتاثرْ
ومهما رادو ننسى الماضي
وايام الطاغوت المنكرْ
تبقى ايام المرّه ابدمنه
وكل يوم انعيدْ ونذكّرْ
؟؟؟؟؟؟؟؟؟؟؟؟؟؟؟؟؟؟؟؟؟؟؟
ماننسه اعدامات الجمله
وماننسه الناس التتهجّرْ
ماننسه اسجون اللفتنه
وماننسه الدم چان المظهرْ
وماننسه الطاغي واحكامه
وزنزاناته وازلام الشرْ
وماننسه الخوف اللي عشعشْ
بينه وبالاعماق اجذّرْ
اولو تندگ باب النه ابغفله
ابذيچ الساعه انگوم ونعثرْ
موت ايحومي ابكل الديره
وماتدري ابيا ساعه ايوكرْ
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
واليحچي الحق طمّو ذكره
واليسكت ساعه ويتفجّر
هذا الموجود اللي عدنه
اوشوف انت ابعينك وتبصّرْ
كل هذا ويردونه انسامحْ
ونعيد الهم ماضي الاگشرْ
وسنين احنه انعيش ابذله
وعربانك تدري وتتسترْ
مايردون النه الحريه
واحقاد البيهم تتسعّرْ
ومن شافونه اكسبنه الجوله
صارتْ عدهم يوم المحشرْ
هذا اللي يدعم بفلوسه
وذاكْ اللي فاتح كل معبرْ
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
وهذا اللي سخّرْ اعلامه
وذاك ابفتوى ايجيز المنحّر
وهذا اللي كفّر كل شيعي
وذاك ابكيفه ايحطْ ويسطرْ
هجمو فد هجمه ابلا رحمه
اوبگلوب الصلفه الماتنغرْ
يردونه انجوز ونستسلم
والهم ننقاد ونتكتّرْ
بس ماعرفو سرْ البينه
نتحدى الموت ونتبخترْ
وشما بالموت ايخوفونه
ابصوب الموت انروح ونعبر
والموت ابعز اجمل غايه
وعار انعيش ابذل ونصبرْ
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
واحنه ابدرب الموت امشينه
ويخجلْ منه الموت اتصّورْ
والموت اللي يرعبْ اسمه
صغناه اگلاده وبيه نفخرْ
گلي ابيا موت ايخوفونه
واحنه الموت اويانه اتحيّرْ
وجربو كل خدعه وكل حيله
وكل ظنهم ننسى ونتقشمرْ
بسْ هيهات ايعود الماضي
وهيهات انهادنْ لو نفترْ
والشعب اللي قدّم روحه
لتظن يتنازلْ لو يخسرْ
آآآآآآآآآآآآآآآآآآآآآآآآآآآآآآآآآآآآآآآآآ
واحنه الارض اللي حضنتنه
مانتنازلْ عنهه وننكرْ
مايهمنه الارهاب الحاقدْ
اشگدْ ماخطط وشما فكرْ
ونعاهدْ كل ام وثكلى
بالروح انضحي اشما نگدرْ
ترخصْ لاجلك روحي ودمي
ياوطني الصابرْ ياجوهرْ
وكل الشعب ايقدّم روحه
لاجلك كل يوم وماقصّر
الحبك كل يوم وماقصّرْ
علي البهادلي
كوبنهاگن نوربرو
10/2/2007
