كيميــاء الحـــب
لمَّن نلتقي ..
إتصد عينك إبعيني
واموت..
إوْ نَظرِتك بالشّوگ تحييني ..
يشهد كل صبح ..
نتصابح آني وياك
وبوكت المسيَّة .. إترد تمسّيني
آني وياك واحد
وبجسد روحين ..
أحس حبَّك .. نبض يسري إبشراييني
تضنيني إبهواك
إوْ أَصل حد الموت
وبكل صوب ..
تاخذني إوْ تودّيني
ونَه ابـْبـَحرك سفينه
إوْ صار گلبي شراع ..
وبموجات حبَّك .. تهتْ ثاريني
تبعدني الرّياح ..
ويگصي بيَّ الموج
بس إيظل خيالك.. ثابت إبعيني
يمعوَّد!
خطيَّة ... إتـَّيّه الحبّوك
شاطي الأمل .. عندك وين دلّيني؟
تدري ابيوم أحضنك
وأشتعل نيران..
يتضاعف ألف مرّة .. "إندروجيني"
واشمَّه ... "الإستروجينك"
عطر ويفوح ..
يالكلَّك أنوثة
وسحر يغويني..
إحضنّي .. أعلى صدرك
بلكي عيني تنام
بين إنهودك الترفات ..دفّيني
وافرشلي الجفون
إوْ حطني وَسْط العين ..
وبرمشك ...
-أحس بردان - غطّيني!
شعر د.هاشم الفريجي
