شتسولف بعد وي خاطري المكسور!
..جام أتكسر بياسالفه تجبره؟؟؟
صفره جفوف أديك وحجيك المسموم
لون أصفر طلع والريح اجت صفره
آنه أدري بصحبتك تالي تطلع نار!!
حركت كلشي حركت صحبةالكشره
عساهه ابخت كلبي الماعرف يختار
و العرفني بيك بحظه وبعمره
كتلك لاتذب جرتك ماظل ماي
(موكل مره ترجع سالمه الجره)
وتذكر من كلتلك لاتلح عالبير
هسه شلون تشرب طلعت الصخره؟!
كطرة ماي روحي ومرهه جفك كيض
طشرهه وبجت واتبدت الكطره
بعد شتريد مني بيادفو اتلكاك!
اكلك ثلج بعدك صارت الجمره
هسه تريد ترجع من بعد ماراح ...
عمري وشد متاعه وتيهت عمره!!
هيج انه غشيم وانغلب مرتين؟!
أحبك من جديد وترجع الكره!!
لاتتعب بعد راحت الشاره البيك
من سديت بابك سدوا الحضره
وآنه ألمن بعد فاتح ضريح الشوك
شباج الكلب مايحمل العصره
بعيوني كبل جانت الدنيه نجوم
هسه أطشرن وأختنكت الكمره
عساهه بذمتك راح احرك البستان
خلهه تموت جوع جروحك الفقره
إله الموت شفتك بس كلت بيه روح
شوف شكد جبتهه وياك عالفطره
وهسه تريد روحي.. ولازم اكفر بيك
مادامك هبل ماتنحسب كفره
مادامك هبل ماتنحسب كفره
اعجبتني جدااا
