الى صاحب الامر والزمان (عجل)

سير بالليل ودگ بابي گتله أهلاً بالضيف اليبدي
ماأعرفه وطببته لبيتي خطار الليله ومتعدي
ضايف والضايف يتكرم وهاليله وياه أبذل جهدي
ناشدني شتملك جاوبته ماأملك بس ثوبي وجلدي
بيتك لا مستأجر گتله وضع المستأجر متردي
أركض عالخبزه وما الحگ ومعيش أطفالي بچدي
شيعي وكل شيعي بهالدنيه يحمل همي وضيمي ودردي
عايش بس قانع بالعيشه ومتعلم عالتمر الزهدي
گال تبيع العيشه المره وأكشفلك أوراق العندي
أتعَيشك ما أجيت أبكيفي أنته البابا عليك أمودي
گتله شرايد گال أتعابك شاعر أنته وتفهم گصدي
گتله أتعابي أبگد الدنيه ونهران التترس وتبدي
گال أبگدهن أطلب وأكثر مرتين أبگدك وبگدي
بس أرضه وغير تفكيرك تجار التدفع وبنقدي
أي مبلغ تطلب ندفعلك ومن تفكيرك شيل المهدي
گتله آنه الرافض سموني ومن أوعد ماأخلف وعدي
متعاهد بالدم ويّ حيدر ماأبيعه وماخونن عهدي
وصاني الوالد بعهودي ومتوصي الوالد من جدي
وگلي بذمتك يبني المذهب أوصيت أولادي المنبعدي
متغيرني بهاي أموالك ومن أسيادك ماأستگدي
ماأخاف أسيادك بلغهم متحضر ومفصّل لحدي
أبمدرسة الكرار أمدرب جنديهم وأبقى الهم جندي
ولو كل الوادم تتبره وأبقى آنه وياهم بس وحدي
ماأزحزح وكت الشده شماضاگت والشده أتعدي
حذرتك هاي أخر مره وهابالك لاتوصل حدي
أطلع من بيتي وخبرهم هاي آخر چلمات العندي
لاماأبيعن ديني وأركع ولچفهم ماأمدن يدي
ولويوم يضل من الدنيه هم يوصلكم سيف المهدي.