لوتدرون
لوتدرون , الحب لوعاش بين أثنين
لوتدرون !
كل الدنيا الحلوة أتورّد
لوعاش الحب بين أثنين
لوتدرون ..
هو الحب يفتّح ورده لوما العشاق الحلوين ؟
هو الحب أيعرف الكًاع لوما أحبابه الفلاحين ؟
مرات يخلينا بآه .. آه ..
وسهرانه سوالفنا أبليل
ومرات ينسينا الآه !
وننسى أفراكه وننسى الويل
ومرات أنشوفه ابمكتوب
يعاتبنا وهاكثر أعتاب
ولو مرة أيغيب المحبوب
تصير الدنيا أبلايه أحباب
يراوينا أفراق ايراوينا
يراوينا اشواق ايراوينا
ولوشاف الأه أتمض بينا
هاساعة أبفرحة ينسينا
الحب يامحلا ساعاته
والحب يامحلا أحجاياته
يامحلا النسمات الحلوة
بليل العشاق وآهاته
ويامحلا الضحكات الترسم
وجه المحبوب بضحكاته
ياعيني أشكد يمر بينا
وياعيني أشكد يراوينا
ولو شاف الأه أتمض بينا
هاساعة أبفرحة ينسينا
لوتدرون الحب لوعاش ابين اثنين
كل الدنيا الحلوة اتورد
لو عاش الحب بين اثنين
للشاعر زهير الدجيلي / 1973
