وما ذكرتك .. ذكرتني السجه بيك
مو لأن ناسي هواك .. لا وحكَـ شارت هواك
انته من كَد ما شفتها ارموشي شالتلك كَلايد من شبابك .. سلمت
ومن نشدتك .. ذكرتني السجه بيك
لمن اتحطلي الرسالة ابجرح حايطنه القديم
وانا اخليلك رسالة ..
فوكَـ طابوكَت اهلنا .. الشايل احبال الهدوم اعله السطح
وبعد ليهسه أثر أبيض نظيف
للعيون الغفت شوط ابين فتحات السياج
ونفس طيبت ريحتك شميتها
رغم ما ظهريه جانت .. جنت احس دنيه العصر
يل سحر لفت عباتك بعد ليهسه سحر
رمح ليل وشايل ابراسه شمس
ويا حلات الضحكه غبشه
وانته تعرف .. هاكثر ناطر غبشتك للصبح
ورجعتني السجه وين ..
من اموتن شوكَـ مجتوف بحلاتك ..
واحيه من حل وجديد من انضرب صليت عشكَـ
ورجعتني السجه وين .. الباب مدرستك كَبل
وانته واكَف .. كَصتك تكَطر نده ..
مرة كَطرت خوف احسها .. ومرة كَطرت مستحه
وانا بعيوني اشوفن لون سدريتك عكس باقي البنات
وجنت امطكَـ علشريط الطلع من طرف الحجاب
واحسد الجنطه الغفت فوكَـ الخصر
وذكرتني السجه جنه .. جنه نكَعد يم عجوز ..
اتبيع شيره ولبلبي .. وحامض وحب الشمس وضروكَـ فار
وانا اشوفك من تسلس مو ابنادم .. طير حب ايكرز ابخد الورد
معود امسودن عشكَـ ..
من تسلس وحكَـ وياهو .. عيوني تتراكض حلكَـ فوكَـ الكَشور
ومن تغط بالشيره اصبعك
جنت اكضن ردن ثوبك
خاف يدمر طحين ويصعد ابراسي الشكر
وذكرتني السجه بيك
شلون من جنت اعله مودك .. ارش دربونتنه ماي
واحط من ريحت ابوي الغاليه
وجان غايت مشتهاتي .. الزم اجفوفك بديه واستراح
ومن يمر مرة ابخيالي .. جفك ابجفي يحط لكَمة ضوه
روحي وركَت تتن تغدي ونايمه ابحلكَـ الزناد
وذكرتني السجه بيك
من ابوك ايصيح ارجع .. ايصيح ارجع
وانا احسن حيلي يرجع من يصيح
وصعدوا باللوري خلكَي وخاطري وشط الولاية
وصعدوا بقجت سواليف وضحك
وشوفي وي كل غرض بالشارع يسولف
والحنين ايمركَـ ابخدي نهر
وانته شايل جيس كاغد .. مردتهّ دمعت وداع
وطاحت من الجيس ماشه .. شايله من الكَذله شفه
بوسة الماشه حلال
وصاح ابوك .. عمي عاونه تره الليله نشيل
وانا من كل كَلبي اسبه .. وما اكَول استغفر الله
الغيبه اهيس مستحبه .. بهيج موقف مو حرام
هسه اجيت ..
وانا ماكو بروحي صفحة مكمله الاخر سطر
بين سطر وسطر كل البيه ليك
النظر سطر وسطر .. والشَعر سطر وسطر
والعمر سطر وسطر .. والشِعر سطر وسطر
وانته اسمك مثل سر البسمله بأول سطر
هسه اجيت .. النفس سجتنه كَبل
جم سنه انباكَت غفل .. جم سنه اخلافك تبدت بالدروب
اشكَد محابس من اصابيع الوكت طاحت عليك
هسه اجيت .. وانا كل عمري قصيدة متانيه اتكمللها بيت
راح اغمض ..
وادري تبقه ابتوت كَلبي البيدك اتخرخش بذاني
حته اكَول الصار مو يقضه .. حلم
حته اكَول الصار مو يقضه .. حلم
..................................
للشاعر foraten.net/?foraten.net/?foraten.net/?foraten.net/? القلعاوي
