قصيده قراتها على الفيس بوك
للشاعر الديواني
اتمنى تعجبكم
ذايب بيك مثل النار بالنــــــــــــار * عله طاري العشگ بجروحي شبيـت
لزمت النار بيدي بلايه ما شــــــوف * بيدي چفوف شفتك ظني گظيــــت
حرگت جروحي سكته بدون ماصـيح * لان صوتي يزعجك سكته ونيــــــت
ما قصر واحس مقصر اويــــــــــاك * او عله كل الطلبته أضعاف وفيــــت
بنيت بدمعي إلك ضحكات وأحــلام * وما گتلك بيوم اتركني مليــــــت
لكن بالعكس كلما تجوي جـــــــــروح * أگول يحبني حيل بناره حسيـــــت
مثل حرگت طفل و مگمط گمــــــاط * من أبچي شتسوي تهزلي البيـــت
جبت بيدي خناجر عينك تشـــــوف * گدامك حبيبي جروحي شگيـــــت
شفتني بعينك انت او ماگلت جــوز * جبت كومة خناجر يمي حطيـــــت
او گتلي اهنا اريدك تذبح الـــــــروح * او بلا اي اعتراض بروحي گصيـــت
علنت ابكل مكان يصير تذكــــــــــار * حبنه او بالطريق ورود طشيـــــــت
حرگت سنيني لجلك وانت مرتــــاح * خلص عمري ولكن ما اهتميـــــــت
رغم كلشي و اگولن خاف انســـــــاك * حروف اسمك بعيني جروح خطيــت
أسف حبك طلع شمعه بجرف مـــــاي * ما لاحك الروج ولكن اطفيـــــــــــت
وآنه بنص بحر والروج عالـــــــي وحيل* بقه حبك ابگلبي او ما اهتزيـــــــت
متت كلي ولكن عدله الجـــــــــروح * وانته بكل شماته بضحكه عزيـــــــت
جبتلك وردة بيدي او رايد اهديـــك * ذبلت مستحه من شافتك جيـــــت
طشت روحه بچف الكرامه الطــــــاح * عله گاع الترافه البيهه مريـــــــــت
لان شافت گمر بس محتوى نـــــــار * حرگ والله بلهيبه شما تمنيــــــت
وطبع گلبي ورد مايكرهه انســــــان * اظل وردة او حضرتك نار ظليــــــت
