(كَولوها)
عتب ماظل بعد ينفع يالأحباب
ولا ينفع ندم وأصفج باليدين
بعتوني برخص كَلولي جاليش
اجه غيري وصرت هاليوم موزين
بمجان الكَلب صرتو وبين الظلوع
وكحل وسط الرمش ومكحل العين
حلفتولي وقسمتو بأغلظ أيمان
وكَلتو احنه لحم ودموم مخبوطين
جا شنهي البده هاليوم والصار
ترقيتو وصرت من المعادين
لتغركم الدنيه وحجي اليحجون
وين اهل اللبس واهل العناوين
كَولوها بصراحه ولاتخجلون
على الهجران يالآحباب ناوين
فقيرانه صحيح ودخلي محدود
بس عندي الوفه يسوى الملايين
صح ذاك المثل ياناس من كَال
لو طاح الجمل كثره السجاجين
جنت حاسب احساب طلعت غلطان
العشكَ هم بيه مختله الموازين
أثاري الي يحب هاليوم يحتال
ومو فد كَلب لازم عنده أثنين
الحمد لله على كل الجرى وصار
واحسبكم احبابي أحساب ميتين
واضل انه الوفي الماينكر الطيب
ويظل محسن اهو شما تمر بيه أسنين
مع تحياتي للجميع
