مساجلة الحكارة لشعراء سوق الشيوخ @جمع الشاعر على الكركوشى

اجريت مساجلة لشعراء سوق الشيوخ وتم اختيار الجكَارة موضوع المساجلة حيث بدء المساجلة الشاعر شهيد الشميساوي حيث قال ...

زماني اهموم جمه ورثاني
وجروحي ارداف واحد ورثاني
جكَاره ابحلكَ وكتي ورثاني
واضن بس نفس واحد ضال بيه

اجابة الشاعر حيدر الشميساوي قائلاً

مثل ما وكتي ضل اوياي ضل بيك
لكن كَمت احسدك لأن ضل بيك
زين انته جكَاره ونفس ضل بيك
كَطف واهل السجن دارو عليه

اجابه الشاعر صلاح اللامي قائلاً

شكثر شوغات من وكتي تلفني
جكَارة تتن وجفوفه تلفني
كَطف ضليت من خلص تلفني
بشارع واليفوت ايدوس بيه

اجابه الشاعر موحان عودة قائلاً

ذبت بجفوف وكتي من يذبني
ولاواحد شكَفني من يذبني
جكَاره ابحلكَ مدمن من يذبني
ابنفس واحد وصل للجعب بيه

اجابه الشاعر علي الكركوشي قائلاً

اخاف امن الوكت انفذ شمرني
جكَاره وبالمذاق انه شمرني
كَطف ضليت ماهدني شمرني
بوسط جانون ماضل اثر بيه

اجابه الشاعر السيد بشير الغالبي قائلاً

روحي الحزن والهم ورثاهه
ولاصح اليواسي والرثاهه
انه روحي جكَاره ورثاهه
فاهي امن الكَطف حط نار بيه

اجابه الشاعر زمن الركابي قائلاً

شتلم بيه زماني مايذبني
وابد يذبات راحه ما يذبني
جكَاره ابطخم شايب مايذبني
وتذكر كل سنين القهر بيه

اجابه الشاعر حسن الشميساوي قائلاَ

روحي الحزن والهم ورثلهه
اجرهه ابحزن ينعه ورثلهه
جكَاره الروح صارة ورثلهه
طفل من كل كتر حط نار بيه

مدائن الجورى
للشاعر القدير
على الكركوشى
الشاعر القدير
حيدر الشميساوى
الشاعر القدير
صلاح اللامى
الشاعر القدير
بشير الغالبى
الشاعر القدير
زمن الركابى
الشاعر القدير
حسن الشيمبساوى
لكم كل الشكر والتقدير
لما نثرتم من حر الماس
ونقاء الروح وصدق الإحساس
فى شوق
لروائعكم القادمة
كونوا فى أسعد حال

شكراً لمرورك مع فائق اعتزازي

بیت اقوی وافضل من بیت جمیل جدا لک شکري وتقدیری

السلام عليكم000
والله ياابو حسين انت صاحب الذوق الراقي
اخترت فكان الاختيار قمه في الروعه
شكرا لك00تسلم ايدك

مروركم يزيد الكلمات رونقاً ايها الرائعين