افتتحت المحاورة على ضوء الدارمي الذي قلته بحق والدي المرحوم سامي شياع المنصوري
فضل عليَ هواي علمني كلشي
دلاني دربي وكَال هم يبني وامشي
وقلت ايضاً
على درب العدل والزين دلني
منه الحل اذا الصعبات دلني
خان الحظ خذاه والدهر دلني
بجحيم وحشمت ما رد عليه
قال عادل المنصوري
يا نجمة كَطب تزهي بظلام الليل
اعتنه التاه اعله نورك وچد المعبار
يا دامل بمركب تعدله امن ايميل
وتصححله الطريج ويكمل المشوار
فل نجمك يخالي وعصف بيَ سهيل
وتكَطع داملي وظليت محتار
قلت
يا صحيح الراي يالبيك استشير
ويا نجم ضوى وهنادسنه تنير
التاه دليته الطريج وكَتله هاذ
ومشه ابارد كَلب وابداً ما يحير
اعليك مندومه القوافي وترتجيك
والشعر ينعاك يالبحرك چبير
انته يا دامل شرع خضت البحور
وبله شراع السفن ما تكَدر تسير
قال عادل
انكَطع دامل المركب وابد ماسار
وعلى اشراعه الصديج وعدو ماسار
الدمع بفراكم للهضم ماسار ( لم يكتم سره )
بچيت وبچت غرماني عليه
