السفارة التعيسه في الأمارات

السلام عليكم ورحمة الله وبركاته

البارحة رحت للسفارة العراقية الموجودة اهنا بالامارات

وياريتني لو ما رايح ..!!

والله لوما الحاجه ولا أوصللها

لا نظام لا احترام

ناس تنذل اذلال لا ينحجي ولا ينشاف

لا حول ولا قوة الا بالله

موظفين مالهم اي علاقة بالمعاملات وخدمة الشعب

ناس كل همها المظهر الخداع وما الهم اي قلب انه يساعدون العراقيين

نسوان تنذل بالسفارة ..!! وين الغيره وين النخوة

لعد مرية تركض من مكان لمكان علمود شغله بسيطة والكل يضحك عليها ؟

كل موظف بالسفارة عباله هو الرئيس ويفتهم كلشي

طبعا اول متروح للسفارة تنتظر يم الباب لحد ميشرفون حضراتهم ..

تنفتح باب السفارة ساعه 9 الصبح

دخلت واول ما دخلت انطوني رقم علمود انتظر لحد ما يجي دوري ويمشولي معاملتي

انتظرت والناس كووووووومة كاعده

والمكان صغير كلش أكثر مما الواحد يتصور

وتالي بس يكعدون الموظفين الكل يتراكض على الشبابيك مال خدمة يعني ماكو لا سره ولا هم يحزنون

المهم لزمت سره عبالك سره مال بانزين

وطبعا ماكو احترام لأي شخص

وواحد يشمرك على اللاخ

يعني مثال بسيط مديروح من بالي

مرية عجوز جانت تريد شهادة بقاء على الحياة

راحت يم شباك رقم واحد ... كاللها الموظف هاي شغلة شباك 3 مو يمي

راحت للشباك 3 رجعوها لنفس المكان وكالولها مو يمنه وهاي المرية دمعتها بعينها وتفتر

انت يا موظف السفارة المبجل ..!! ترضاها لامك ؟

والله شاهد على كل كلمة أقولها

خربانه خربانه

وفوك القهر صارت ساعه 1 الظهر وهذا وكت انتهاء الدوام بالسفارة ونفس الناس اللي جوي ويايه من الساعه 7 الصبح بقو لحد الساعه 1 الظهر وما مشت معاملاتهم وولا استفادوا شيء

ملاحظة : أني عراقي وأبن عراقي وأبن العراق ومن حقي احجي وأني مسوؤل عن كل كلمة كلتها واذا قره هذا كلامي احد من السفارة فأني مستعد لأي استجواب

أخوكم بالله

عمر بن نبيل ال سبعاوي