الدنيه فاسده ولا تستقر بيهه
انشدك هالاراضي وين اهاليهه
اهاليهه مشت عنهه وخلتهه
ضلت تايهه والغرب سكنتهه
بيهه اتملكت وقصور علتهه
والحي اليظل ايشوف تاليهه
تاليهه يشوف اجناس غير اجناس
ستره وبنطرون امكشفين الراس
هذا من زمن مؤسس الاساس
مثل فرعون يوم الحكم بيهه
حكم بيهه وخله البطل بيهه حكَ
واليحجي العداله شكثر يشبع دكَ
يربي ترضى الافاعي تنضعن للركَ
مهبطه روسهه والهضم غاطيهه
غاطيهه الهضم تصبر على امر الله
ومن جور العليهه افلوس ماخله
لولا الخوف ماواحد قره وصله
مامن غير ربك يلتفت ليهه
مامن غير ربك يرحم عباده
ومن الجوع كلهه شردت اشراده
اكلهه وشبع بطنهه ماتبي زياده
خبز اذره وسمج والماي يرويهه
يرويهه بالماي وياكل اتميره
من اهل هذا الزمان انتزعت الغيره
كثر بيهه الفساد وخرب الديره
المعروف انمحه والبطل تجريهه
تجريهه ونعمل غيرهه ونزود
ومن نوله فلا نرحم نزود ازدود
بعد اشلون يرحمنه الكريم ابجود
من تعرض الزينه مانسويهه
زينه مانسوي ولا امر معروف
كونا ضاع منه المستحه والخوف
لوجت المره تمشي بين الصفوف
تمشي باعجود اتشمر ايديهه
الدنيه فاسده ولا تستقر بيهه
