تعال افرش اديك بوسط اديه(قصيده الوحده الوطنيه)

تعال اليوم اريدك عــون وياي
تعــــــال افرش اديك بوسط اديه
تعال نشد جرحنه ونطوي الفات
نــدك الساس ونعـلي الثنيــــــــه
الوطن محتاج ولده بساعة العوز
يريـــد الغيـره بي والبي حميـــه
يوميـــه الوطـــن ينزف دمه وآه
يصيــر أشلاء ويضــــوك المنيه
محتاج وأريــدك عــــون وحزام
قضيتنــــه اصبحت نفس القضيه
عليك اللي جرن هم صارن وياي
وعليــــك اللي سدن هم سدن بيه
أريدنك ذخر لو جاسني الضيـــم
أريدك عون لجروحي وتجيـــــه
وتلكاني ألوفي لو صحــت فزاع
أصير لك جسر واعبــر عليـــــه
خلصنـــه العمــر كل احنه صيام
شيصيــر اليـوم لو نفطر سويـــه
تعـــال وياي صلي واسبل الايــد
واصلي ويــاك وأجتفهـن اديـــــه
وتعال نخلي عرش الوطن بالغيم
ونصوغ التاج من نجـم الثريـــــه
ونخلي البصره تغفه بحضن بغداد
وتبــات اربيـــل بارض الناصريه
تعـــال بلا هــويه و أنتمــــاءات
العراق يصيــر عنـوان وهـــــويه
تعال نعيـــش كلنه بضحكة العيد
ونخلصهه بسلامــه وأريحيـــه
عراقييـــن كل من زاخـــو للفاو
وابـــد لاتفرقـــه ولاطائفيـــــــه
ومثل شدة ورد بينه الوطن صار
عرب واكراد سنــه وجعفريـــه
قدرنه نظل سوه شما دارت نعود
نـــرد ونلتــقي بهــاي الوطيـــــه
مثل دجلـــه وفــرات بلا مواعيـد
فطــره تشابكــن وعلى السجيـــه
تعال وعنـــدي خبزه تكفي لاثنين
تعال شويـــه الك وشويــــــه اليه
ونغمسهــه بتعبنــه ودمـــع الايام
عوافي تصيـر خبزتنــه وهنيـــــه
ونرجع بسمه ضاعت وي السنين
ولجل كاع الوطن ترجع زهيــــه
عريس الوطن بس ينزف دموع
وليلـــة حنتـــه جــــروح ورزيه
تعــال وياي خل نجمعله وردات
ونقدمهن مهر واجمـــــل هديــه
وخل نزرع عشك ونطش رياحين
وتخضر هروشنه الجانت نديه
وطنه اجمل وطن مرسوم بالكون
ومن ربك هبـــه واعظم عطيــــه
بس هذا الوطـــــن يرادله ارجال
صفاء وطيب واخلاص وتقيـــــه
حتى يصيرجنه يشع وفه وطيـــب
ويكفينــــه سوى ويلمنـــه فيـــــــه

شاكر الشمري

احسنت نفس عراقي مخلص
لافض فوك وعاش نبض قلمك
ايها الرائع تقبل تحياتي
وانافرح لاني اول المارين بهذا الابداع

احسنت وصح لسانك اخي الشاعر شاكر الشمري
نحن في امس الحاجة لهذا الصوت الأصيل
ولهذه الكلمات التي تلغي من قاموسها
كل ما له علاقه بالطائفيه
تحياتي لروحك العراقيه الأصيله


تثبت لجمالهاو لروعة مضمو نها

الله عليك ؟؟؟؟ والله شعرك مؤلم جدا عاشت ايدخ اخي