حمــــل سيــفه علي و خلــــه العــــدى ابحيـــره

بسم الله الرحمن الرحيم



اللهم صل على محمد وآل محمد


***




علي الكرار لو لاكبر أبو الغيره



حمل سيفه علي او خله العدى ابحيره



**



نِزَل ساحة الحومه فارس املثم .. و دار ارحاهه بيده و فاض موج الدم



چن طاحون واليقرب له يتخذم



صمصامه لمذهّب لمّن ايديره



حِمَل سيفه علي و خله العدى ابحيره



**



بچفوفه گلب أولهه تاليهه .. وابحر الوطيه اجسوم يرديهه



مِثِل نسر الفيافي رفرف اعليهه



و مِلَك أفق المعارى و شردت الطيره



حمل سيفه علي و خله العدى ابحيره



**



درعم و بحسامه اصفوفهم شگهه .. كتيبه اعلى الكتيبه ايطب يصافگهه



و كل هاي الوسيعه اعليهه ضيگهه



و يِصَغّرهه علي اشما چانت اكبيره



حمل سيفه علي وخله العدى ابحيره



**



سبحة جيشهم خلاهه تتنثر .. والنعمين والله من عزم لاكبر



صال و جال بيهه و صوّت وكبّر



و غلاف الجوي طرّه ابصوت تكبيره



حمل سيفه علي و خله العدى ابحيره



**



نزّل عالمعسكر صاعقات البين .. وصاح الجيش ها فارس بدر وحنين



طر قبره واجانه ابسيفه بو الحسنين



حيدر هذا حيدر مانظن غيره



حمل سيفه علي و خله العدى ابحيره



**



صوّل وانتخى و فرهدهه واتعلّى .. و جيش اعداه زمّه ابقبضته و فلّه



على الجيمان زلزال الغضب حلّه



و خله النايحه ابكل حي و كل ديره



حمل سيفه علي و خله العدى ابحيره



**



يرعب والشجاعه التفت ابزنده .. معدن هاشمي معروف بالشده



ظنّوا منّهِ اتخلصهم الشرده



اشما اتطول المسافه عنده اقصيره



حمل سيفه علي و خله العدى ابحيره



ـــــــــــــــــــــــــــ



ـــــــــــــــ



ـــــــــ




لخادم الإمام الحسين عليه السلام




السيد محمد الشرف

افلح من صلى على الحبيب واهل بيته الاطهار

اللهم صلي على محمد وال بيته الطيبين الطاهرين
بوركتي ووفقتي ودمتي بالخير .
الاخت الفاضلة ام فيصل
سلمت اناملك على طرح هذا الموضوع المجلل
وجعله الله في ميزان حسناتكم انشاء الله
تقبلي تحياتي وتقديري 0

الف شكر لك عزيزي القلب الاسير
اسعدني مرورك وكلماتك الطيبة
دمت بكل الخير
مع تقديري واطيب امنياتي