رائعة المرحوم سامي شياع المنصوري
يا حبيبي
شهرزاد ابتلت كل ليلة بسوالفها الكصيرة
وآنه سالفتي طويلة والله يا جله طويلة
شهرزاد اعيونها اتبوك الليالي
ما غفت ليلة اعله حيله
وآنه باكتني الليالي
وضيعن راس الشليلة
شهرزاد مساهرة لطرة الفجر
كاعدة بحضن الملك وهي تحجيله
وآنه ساهر طول عمري
اويه النجم عود اشتكيله
نفظت صرة حجيها وفرغتها
بليلة وحدة والف ليلة
وآنه متحمل حجي شكابين عندي
ومالي حيله
كبر عشها وفرفشت ذيج السوالف
واصبحت اهيه الاصيله
وآنه عودي صار طحمة
ذوبل وروحي نحيلة
الكيض مر عني وسحني
والشته اضلوعي لواهن جحيله
مثل محار الشواطي
الطين غاطيني بجليلة
وجنه ما يسمع نخوتي
اللي جنت آنه انتخيله
صرت مكفول برحمته
يا حسافة اللي جنت آنه كفيله
شلع اهروشي ومردني
وآنه كاعد واصطبيله
هاي حفنه امن المتاعب سولفتها
وبعد سالفت العشك كلش ثجيله
يا حبيبي
لا تخلي الروح منتجيه اعله حيرة
تايه بدرب الصحاري
وتنشد الناكة الذليلة
عمري مل الصبر وازود
نوبة يعثر نوبة اشيله
واحبست دمعي وحسرتي
ودثرت روحي العليلة
وكلت اظل اوياك لاتله الشيب
فانوص وفتيله
احترك خل احترك لاجلك
بس ضوى اعيونك يدوم
يا حبيب الندى شاهد والنجوم
مناطرك واللامني خله يلوم
نام ورد الرازقي وما مرني نوم
اعيوني ذبلها السهر يوم اعله يوم
اتناك يهلال الفطر مو كافي صوم
تدري عندي شوفتك عيد وسعادة
وبسمة اشفاهك حياة
ونغمتك احله وسادة اعليها ابات
ورمش عينك من تسلهمها وتفكها
تبقى مطبوعة اعلى كلبي الكلمات
يا حبيبي
بلايه حب العمر مو اسمه عمر
اسمه ممات
يا حبيبي
اكرهت حتى الذكريات
مثل كرهي لالف ليلة
وللملك والترهات
يا حبيبي
ابلايه حب اناشدك شنهي الحياة
خليها عشرة عمر
عوف الكلت والكال
احلف بهاسي الحسن
بمضيف ابن هذال
الخيل لو كدشت
موصوج بالخيال
جرب تشوف الوفة
ورجال خوش ارجال
نارك واكول افيه
خدر حبيبي ادلال
بس لا تزيح الجمر واتكومه بالدلال
