كل سلطان ضده اتصير الكلوب
وعلي سلطان بي مجنونه الكلوب
قائد تحت امره الدنيه والناس
الشمس رجعهه مافك حلكه الغروب
علي الماعاف ثوبه ايعوفنه اشلون
امس ركع الثوب الخاطر الثوب
رئيس وجيبه خالي اشلونك ابهاي
وموبس هاي حيدر شال الجيوب
علي ابرقة دمع عين المراجيح
ترف بس بالمقابل قالع البوب
علي ابكد ماترف حاقد على النار
اشلون اتجوي بخدود التنانير
قالع باب خيبر بس ترف حيل
الفراشه اعله جتفه اتنام وتطير
البلابل من يسولف تصفن اعليه
وعلي اول واحد اتحبه العصافير
علي الماي اليشرب الماي للماي
وعلي الماي الترس حلك النواعير
علي اعكال وحجاب وعفه واخلاق
علي ادري اهواي وشويه التعابير
علي العاشر الفقره ورافك العوز
ولحد مامات صاحب خبز الشعير
علي الطلك الدنيه وشاهدي اوياي
لهسه اتبوس ابرجله الدنانير
علي الفرحه البقت بعيون الايام
وردت روح لوجوه التصاوير
علي ايقدس الدم ويكره الثار
مثل مايوسف اشكد يكره البير
امس موهوه حارب همه جبروا
علي ضد العنف ويموت عالخير
يطب للمعركه ويوزع ادروس
وعلى الشردوا علي ايوزع تحاضير
شعار ايردده لليوم ابوحسين
يموت السيف ويعيش الطباشير
التوقيع
مذبوحه المدارس والعلم مخنوك
ودورنه الصفوف ومالكيناهه
مو رفعت علم بس شفنه رفعت روس
انرفعت مارضت ينداس فوكاهه
وروس اطشرت بالصف على الرحلات
موفوك الرمح عالقلم شفناهه
جفنهم صار زيهم والجنط تابوت
اتصور بالجنط طلاب شلناهه
