قصيده اخر بطاقه للشاعر الكبير نعيم الفراتي

اخر بطاقه

الحزن والخوف خواني امن الاكماط
اوجمع بي الوكت بيهم صداقه
الحزن نوبات من ايغيب لحظات
يجيني الخوف يشبجني ابنطاقه
صديجين اويه دمي انمزجو اسنين
الكل منهم علي راسم سباقه
انا اوياهم صرت ثالث على الروح
انهجم بيتج يروحي اشهالعلاقه
دامنت اعله طبعي اوصبرت روحي
اولساني الطيبه عودته اللباقه
اوعودت النفس تطرب على الاه
والحرمان باشكال انشقاقه
بعد شيريد مني الدهر يا ناس
مادامي خذت طبعه اوسياقه
الدهر معروف ما نافق على انسان
النفاق أبينه اوكلمن نفاقه
طبعي اني صريح اوسري جتال
اودليلي ايكولها ابكل اشتياقه
ابقى انهَ صديج الحزن للموت
عراقي اوسره مدفون ابعراقه
يلوموني العواذل واليحبون
واهل الدردشه واهل الرشاقه
يكولون ابتعد عن الحزن غاد
اوكَل للخوف يمك مالي طاقه
مكسور الظهر لوماله عكاز
او يشوف الخوف واكف على ساقه
يبقى ينتضر ويطيح للكاع
لو يحتار واتكتله الحماقه
انا ادري الزمن افراح واحزان
وكل واحد اله طعمه اومذاقه
وانا ادري الحزن اغماء للروح
اوطبع الخوف يكتل لو تشاقه
حافظت اعله روحي ابغير ذل الذات
اوتمايزت البدن باحلى الاناقه
واذا طبع اليطيح ايعيش مهضوم
او لحد الموت ما يلكَه الشفاقه
خل انطش ورقنه اونقره الحظوظ
او ياهو التربح ابجفه البطاقه


الشاعر نعيم الفراتي

صح لسان الشاعر نعيم الفراتي وعاشت ايدك على النقل اخي الكريم
تقبل مروري
انا صلحت بعض الكلمات في القصيده الى الاصح وهذه هي
الحزن نوبات من ايغيب لحضات
الصحيح هو
الحزن نوبات من ايغيب لحظات

مكسور الضهر لوماله عكاز
الصحيح هو
مكسور الظهر لوماله عكاز

خل انطش ورقنه اونقره الحضوظ
الصحيح هو
خل انطش ورقنه اونقره الحظوظ

ننتظر كل ما هو رائع منك اخي الكريم
تحيتي لك

احسنت اخي قصيده رائعه
ووافره في الصور والمعاني
لك ولشاعرها جبال الحب
يالغالي