وصلت الباب داره تهزني الاشواك ومن دكيت اسمع صوت عاذل
يكلي شعندك وشلك بهالدار حبيبك من امس يفلان شايل
أحس حجار شفتي و بالكلب نار ودمع عيني على الخدين سايل
كلت ما صدك بحجي اليعذلون ولا هذا طبع حلو الشمايل
ما عايل حبيبي وياي فد يوم ولا آنه الذي وياه عايل
وفاه وياي مو من دكة الباب ولا عدنه الوفه كومة رسايل
دراويش بعشكنه و ندري شنكول ولا نحجي الجذب لمن نغازل
من أهل الله حبيبي وعذري الاشواك من يجفي أحبه ومن يواصل
ولا بايع دلال وطبعه هجران ترف لمن يراضي ومن يزاعل
حسن رباني عنده محير الناس أبو خدود الحمر سود الجدايل
بشفافه العسل ما منه موجود ومنه تغار كل أهل المناحل
وما بين الظنون أنفتحت الباب هلاهل صارت الدنية هلاهل
ركضت وفرحتي خلتني مشدوه طفل جني وتركصني الجناجل
ما ثنيت دكتي وبين أهواي ولا طالت وكفتي على المنازل
تلاكينه وشبكنه الايد بالايد مثل ملكه البلابل للجداول
يعاذل ما يفيد وياي عذلاك ولا بالقيل نهتم ولا القايل
أخذ حجيك و روح بعيد ليغاد متغير طبع ولد الحمايل
منقول
للشاعر
بشار الشداد الحياوي
يرجى مراعاة الامانة الادبيه منعا للحذف مستقبلا مع التقدير
