اذا موبيك اسولف انه ما موجود
لان بس بيك اسولف كل وكت آنه
او تدري انته بمكانك بيه وين ايصير
بس اشويه اوخر تطلع اهنانه
مو بس انه احبك انه وانه هواي
وبعد مني عشرة انحبك ويانه
ادري انته بشر بس هالخضار منين
ابو البستان شافك حرك بستانه
الورد من شاف طولك بس عليه مريت
مايقبل بعد يكعد بسندانه
ادري شلون رايك يعني كلنه انموت
كول انموت كنه منين دفانه
الحانه وداعتك سكرت ناس اهواي
بس انته الوحيد السكر الحانه
بت هوفن امس لو سامعك ماصار
يم صوتك امس جا كعدن الحانه
يلوموني من اشوفك اسكت امن الخوف
عمي الشاف طولك ضيع السانه
ربك بالخلق سواك بس سواك
وانه وذوله مدري شلون سوانه
لاتنطينه عين نلهس بيك
بس انطينه جارك نشتم اردانه
بس كون افتهم فارس احلامك وين
ونيال اليشوف امبارك حصانه
بس اوكف دقايق رحمه للعباس
بس اتمر عليك اتطيب مرضانه
ما حبن هلك منهم اخاف اعليك
انحب يوسف نعم بس نكره اخوانه
اذا بس انته بيها الدنيا جنه اتصير
واذا مابيها انته الدنيا خربانه
للشاعر المبدع
علاء الياسين
من مكتبتي الخاصة
