عمت عين الزمن خلانه متعوبين
منين نجيبها ترجع عكس تندار
مرة نگول فرْجت والحزن ينزاح
وهلهولة فرح نسمعها من كل دار
ومن فرط الفرح ما نثبت على الگاع
نرگص ويه رگص الطير عالأشجار
وبكل بيت تلگا عامر الديوان
تتبادل الوادم أجمل الأخبار
ومرة نشوفها ضاگت علينا ردود
ويرد بينا فكرنا مسودن ومحتار
إذا حكم الله هذا بالحكم راضين
وفوگاها نصيح الحمد للجبار
وإذا ظلم البشر ما نسكت على الجور
شيطان ال عن حگوگه يغظ لنظار
ومو هذا طبعنا زوبعه بفنجان
ولا سحابة الصيف الما تجيب امطار
ومو هبة خجل، فزعة شرف ما يوم
نتوارى إذا نفزع عن الأنظار
إحنا اعصار لكن ما يهد بيوت
واذا يضرب أبد ما يقتلع لشجار
عواصفنا تهبْ لكن بناء تريد
لأنْ بس من شيمنا النهضة والإعمار
ومو إرهاب إحنا ولا خراب نريد
نجنح للسلام بعزم وبإصرار
گالوا بالمثل من غابر الأزمان
إذا تريد المؤثر تابع الآثار
مطلبنا الحوار وبيه مأمورين
بالقرآن عِدنا وثابت الأخبار
خل نتحاور ونتبادل الآراء
لأنْ بس الحوار يولّد الأفكار
طبع ابن آدم بآراءه مره يصيب
بس مرات كثره تخونه الأقدار
إذا رب الجلالة يحاور المرسول
بعد ياهو ال يعذرك من تجيب اعذار
يظل هذا وطنا بالعرگ نسگيه
وإذا يطلبنا بالدم نرخص الأعمار
وإذا يطلبنا بالدم نرخص الأعمار
مع أجمل التحايا...
( منقـــــــــول / للكاتب جعفر بو حســـن )
ارجو كتابة كلمة منقول للأمانة الأدبية ومنعا للحذف لاحقــا ً
