جفاك اكبر محطه لجمع الدموع
وقطار العين عاشك سجة الخد
خفي ناب الجرح ما بان وياي
بس كبال شامت نابه ينحد
ظلام بعين جرحي ونار بجلاه
لمن ينطر شفاكك ناره تخمد
انه ريحة حمد بجفاك شميت
تنتظره الدروب وبعد مارد
ياونسة صفنتي بليل وهمان
يصب لون الدموع عليك اسود
على نفسي وحشم الخلك وياي
اوصله لباب ريتي بوجهي ينسد
اكابر واليكابر دوم مامات
فلا يسندني واحدظلي مسند
اشم ريحة الخاطر جن اشم بيك
ذبل وردة بجفاك كسور ورد
لون الدله تبقه بغير فنجان
بيبان المظايف كلهه تنسد
عله عين الصبر خطيت نيشان
ماتنساني صدك اله ترمد
اوكل بالجرح شمات لو جاع
يظكون بلهاته ويطلب ازيد
واظل اتمنه اشبكك حيل بعظاي
ولو عمر الجزر ما شبك بالمد
تشع ريحة صفنتي غيوم بسماك
ونده صورك مطر بحشاي يركد
تيتم خلكي عكبك والحزن سيف
باذان السيف صوت اعظاي غرد
عله خد السفن الكاك مجبور
شامه انته وتعجبك شفة الخد
بقلم/ الشاعر هاني العكيلي
