ياشذر طيفي ونثيث اصباي
دبّرني اشتهيتك
شوغة الرغبة كلتني
اومن اذكرك...اتخرخش ابگلبي سوالف مدري شنهي
اومدري ليش..ابروحي صمّ اطفال تنشغ..اشتهيتك.
اشتهيتك
گاع تشرب ملحة اجنوني اوتخضر تين برّي!!
تين الولاية غشيم اوطبعه فاهي..
وانته ياشيرة اسوالف
اتعســّل الحنظل لون جسته ابحلاتك!!
اشتهيتك تغسل اجروحي اعله عرفك
وانته تندل.
اشتهيتك تنفخ تراب الكناتير الشلتها
اوتكوي قمصان الونين الطبگتهه ابصوت (داخل) !!
صوت (داخل) بي لگيتك...اوبي عرفتك
اوبي بچيتك واشتهيتك.
انت تدري من يوّن (داخل) اهيــّس روحي
لضلوعي تشيغ .. ترگص الگصبة على ريتي
اوچنـّي اغط
لحزامي بالكاس
اومراجيح الطفولة الماشفتهه..
وانهدم جامه على جامه!!
صوت (داخل).. شيلة امي.. اوحلم ابوي
وزهو جدي وفحطة عيونه اعله (قوطية) تِتــَنْ تدهن لهاته!!
صوت داخل.. زفة البردي التمندَل فوگ شختورة (علاهن)
ولـ (علاهن) سالفه.. كل گلب حمرية صايغهه نشيد
اومو وكتها..
انه اشمّك وي (علاهن)..
ويّه كل برديّة خدرت... من يجيب الروج ريحة سكر ختلات الحبايب!!
وانه احســّك ويَّ كل عطــّاب من (بحّة) حنين..
و لاعساه ايطول
عمره الــّلام گلبي ...لاعساه
امجرشه روحي.. والشته اعله الباب
عض سِنـــَّه تسابيج ابغرفتي
وانته يا باب اليفرفح عافية اوباگة ربيع ...
اشلون اسدّك
او ليش اسدّك؟؟
فدوه طفــّرني سناسل شوگك
الظــُفرت گصايب جمر صدّك
گطــّع اخيوط المروره الشبگتني
فالة الحنيه يمــّك
والسچاچين التحد بيها خذتني
گوم طش وحشة غربتي ابشذر خدّك
كاسِر الظلمه ابطلعتك
يا ضوة اليتمزلگ ابضويات (دجلة)
اشلون اهدّك؟؟
يا شلب روحي الشتلته ابجـبل ودّك
گوم سلسني اعله كيفك
فرّع الليل اعله صدري
او دوفـْـنِي ابـ (حرحارة) ايدك
واچفي شرقيتي اعله شرقيتك حبيبي
ابهيدة خل ارتاح ..زِقْ ريتي ابمهفة
عسل شفتك.. اولاعساني ابيوم شفتك
يالگلتلي:
لذبح الليل الخنگ روحك حبيبي
واشتل البسمة اعله عتبة شفتك
السكرانه شوگ ..
إنته گتلي
لفــْتـَح البيبان كلهه..
واغلگ البيبان كلهه
او (هيْتَ لك ) بس الك وحدك !!
لا (تِقِــدْ) مني قميص
ولا (أقـِدْ) منك قميص
لأن احنه اثنـينـّه ابلايه قميص !!
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــ
للشاعر السيد نوفل الصافي
