مغرورة
ما الومج بعد ماتسوه حسبت لوم
يالعفتي الحنان ورحتي للذله
اسلوبج اعرفه وماكو شي مضموم
ورسمج بالظلام مغمض اندله
جرحي شماكبريسهل علي ويهون
ولا ايدج تضمده بيوم وتشله
رفعت شراع صبري وابحر بلياج
ومنج كافي كلبي يريد يتخله
طلكت الظلام الجنت عايش بيه
ما اقبل غرورج بيه يتسله
كشفت اوراق غدرج اعرف شما بيج
لغزج مو صعب يسهل علي حله
عانيت الأمر منج واريد انساج
للأن انتي عجيبه اشلون من يامله
احس براحه انه وانتي عني بعيد
وايام العمر تتورد وتحله
جنت عايش ظلام وانتي بيه كابوس
ونموذج مثلج بهاي البشر قله
وجودج في حياتي ذنب مامغفور
وعذاباتي وضياعي ولوعتي وعله
ومجبور من اشطبج من حياتي الأن
تدرين بعذابج شأخذ وشخله
من عمري الكظيته وياج بس آهات
مامجبور اجازف بالعمر كله
يبت الناس كلمن في طريقه يروح
واخذي اللي الج العنب والسله
مغروره الغرور البيج ميخليج
ودربج مو صعب والاعمى يندله
من طبع الجذب مايخدم الانسان
ولايوم السفح عالجبل يتعله
يالعمرج ضياع وانتي غيمه صيف
وعلى بعضج غلط واحجايتج زله
ظنيتج حقيقه وبيج طبع انسان
شيصحي ضميره الينكت ابخله
اتحملت الذنوب كلت ايجوز
الذنب اللي عدهه اتقره وتمله
ما اجرعج بعدمابيه عالشوغات
اذا اجرع النخله شيجرع السِله
هذا اخر كلام وقررت انساج
احجيهه بصراحه وارفض الذله
