محمد رحيمه الطائي. . . وياك وين انتهي

وياك وين انتهي

وك انه اشوف المشي بظلمه ودرب مسدود

بس غمضت علثقه ومديت جفي الك

وادري من اخلص الدرب تاليها ارد اردود

ليوين ابقى انتظر؟ واعصابي مثل الجمر

احترك وحدي واشب والصبر بيه حدود

وسنين اريد اوصلك تايه والوم الكلب اشجابني تورطت

سنبله وترجف رجف من يكبل الحاصود

بصحرا وصدايد قهر . . .لو حدي بضهاري التعب

واصرخ كتلني العطش وتبده ماي الجود

وك ليش من اريدك تجي بحللم تبخل علي

ولو مره اجاني الحلم بيه انت ماموجود

تعب عيوني السهر. . .وودعني حتى الكمر

ظليت انه الوحدي بوحشه ليالي السود

من اولها ردت انسحب وكتلك دربنه صعب

رغم الثقه بموقفك بس الحذر مريود

وشوف النتيجه الصفت. . .

الصفت الكلب ذاب انتهى والجسم صاير عود

ولو عندي قطره امل انتظرك اني عمر ودموعي هي شهود

مرات الوم الكلب واقسي عليه بلعتب

بس انكسر خاطري ادري الكلب ممرود

اشجابك يا كلبي اله ؟ مو طيره انت جنت

ويا طيره قبلك اجت تتحارش بصايود!

عاشت الايادي
وسلم لنا هذا ا لذوق الرفيع في الأنتقاء
ننتظر منك الأجمل
تحياتي