((مشاية اجتلك شيعة الكرار))
ياموسى ابن جعفر جينة الك زوار
واحدنة يتلوة وجبدة يتفطر
من نذكر مصابك والسجن والسم
تشب نيران بينة وبالكَلب تسعر
نور سيدي شكَك ظلام الكون
مثل الشمس مايحتاج يتفسر!!
بيت الله تحجلة الناس عام بعام
يحج مرة بحياته مسلم اليكَدر!
وانته أزيارتك مفتوحة عالايام
كل يوم العهد وياك يتكرر!
كل ظنهم نخاف وما نجيك أنزور!
عمت عين الجدم لو عنك اتأخر!
شلي أنيّ بلساني الماصرخ لبيك؟
وغم راي الجفوف الماتدَك حيدر!!
مشاية اجتلك شيعة الكرار..
تسحَك عالمنية بجدم مايعثر!
أذا واحد وكَع مية التجيك ازحوف!
لأن حبكم سفينة وبالكَلب تبحر!
رفعنالك كَلب فوَك العلم عنوان..
وروحك ندري بيها ويانة هالتفتر!
صد أعلة الجسر جم واحد إلي طاح؟
من أجسادنا سوينه ألك معبر!!
وهنيالة اليموت ودمه يمك سال!
ويم بابك يبو الطلبات يتوذر
لأن أزيارتك رحمة وفرج للناس
وندريك الشفيع بساعة المحشر!
نبقى وياك متحدين يامولاي
ولا بينة اليخاف وكَام يتعذر!
وحَق جبدك يبو الطلبات المفطر!!
وحَق جدك أبو السجاد والأكبر!!
وحق دم الرضيع السال والمنحر!!
وحق جفين طاحن من المشكر!!
نبقة احنه نزورك كل وكت مولاي
لو تمطر فشَك وأرواح تتفجر!!
لو تمطر فشَك وأرواح تتفجر!!
******************
نلتمسكم الدعاء
الشاعــــــــــر
جلال البطاط
