بلا عنوان.....!!!!!

صادقت المحكمة الاتحادية على الانتخابات !!!!!!!
و الان ماذا سيحدث؟؟؟؟؟ هل ستشكل حكومة هل سيكون هناك خلاف آخر حول الكرسي المشؤوم هل سيصحى السياسيين و يقولوا مع انفسهم لمرة واحدة على الاقل ( كافي خطية الشعب خلي نشوفة شوية )؟؟؟
خلي نحجيه بالعامي :
مو كافي عد قهر و ضيم مو صارت حتى عيب شغلتنة كدام الدول البقية, الناس وين صاروا و احنة وين نزلنة العالم يومية يتقدم خطوة ليكدام و احنة بكل ساعة نرجع الف خطوة ليورة مع الاسف الشديد هذة العراق هيجي يصير بي مع أحترامي لكل العراب ( الشرفاء ) بس أحنة نضل تاج الامة العربية و السد المنيع الي ضل حابس الشراذمة الايرانيين على البوابة الشرقية لسنين كثيرة و شوفوا هسة شلون فايتين بنص الحكومة او بالاحرى هم الحكومة نفسه قبل جان أكبر ايراني ميتجرأ يخطي خطوة على الحدود.....و العراقي الان صار منبوذ من الكل وين ميروح محد يريدة بالوقت الي جان بي كل العرب عدنة يدرسون و يتونسون و يفوتون و يطلعون و محد يحجي وياهم شي !!! هذة كل نسوا بس أرجع و أكول احنة عراقيين من يومنة عدنة حروب و ننتصر و نوكع و نرد نوكف و يضلموه علينة بس الشمس تكول هذة العراق ما أعوفة لان هوة الي منور الدنيا برجالة و ابطالة و صفحاتة البيضة الي نضل نتشرف بيه الى يوم يبعثون..
سلامي يا احلى بلد سلامي يا أمي و أبي سلامي يا ولادتي و موتي سلامي يا شمس الدنيا و قبلة خاصة جدا من شخص عاشق جدا و ولهان جدا جدا لاحلى و أرقى و أجمل و أعذب و أطيب و أحن و أسمى بقعة بالدنيا (((( بغداد )))) قرة عيني و حياتي و مماتي و دمي اللذي يجري و أن شاء الله منصورة دوم و زاهية بأبنائج النشامى و ترجعيلنة مثل قبل و نرجعلج و نعمرج و نبنيج يا احلى ما خلق ربي..
و أخر شي أكولة (( أمانة على كل عراقي و كل من يحب العراق يدعيلة بالفرج و الخير و النصر و السلام )) آمين يارب العالمين..
شكرا لصبركم..