باب الكَلوب للشاعر ثامر المالكي
من اسنين طَــلكَ عُـــوده زريـــاب
وصارت سهله كلش فركَه لحبـاب
بعد تحجيلي إلمَن والحجي انبــــاكَ
وظل ياهو اليكَوم ايصيـر سيــــاب
اسكت والسكــوت ايفيــــدك اهـواي
وانصحك لاتفـــك بيبـــان إلعتـــاب
لأن النــاس قفــلـت بـــاب إلكَلـــوب
بس كَلبي الغشيــــم امشـــرِّع البــاب
ولأن بالكَاع صارت كــل إلنجـــوم
ولأن الذهب صار ابرخص إلتراب
وكاَمت هالسمـه اتضـد التغــاريـــد
وظل حتى الكناري ايحَسد إلغــراب
و لأن ماظل علاج ايطيب إلجروح
ولااحجاية محبــه اترَجِّــع الـــروح
و ولا صاحب يجيك ابساعة الظيج
و ولا ورده ابحياتك ظلـت اتفــــوح
وكل باب انقفل مــن دنيتـك هـــاي
بس موسى ابــن جعفـر بابـه مفتـوح
لاتنغر .. ولااتصـدكَـ إليكَولـــــون
و ولا تصبح جبل واتعادي لسفـوح
و ولااتظن الصبرلك صار أيـــوب
و ولا اليصنع سفينه ايصيرلك نـوح
اريدك كون تعرف كلشي مظـمــوم
واتفكـر بساسـك كَبــــل إلسطـــوح
وإذا صابك ضعف باوع للــحسين...
تفـر اجيـوش منَّــــه وهــو مذبـــوح
