نذر اعيادة والعراق

قال الله تعالى
بسم الله الرحمن الرحيم
يوفون بالنذر ويخافون يوما كان شره مستطيرا”
كان ايام زمان واحد عراقي اسمه اعياده يعيش في احد القرى المجاوره لبغداد
ونذر نذرا
انه اذا ابنه انقبل بالكليه العسكرية يطش عشرة دنانير واهليه
انقبل ابن اعياده ودخل الكلية العسكرية لانه من الاوائل على محافظة بغداد
صاحبنا اعياده كام يلعب الفار بعبه اشلون هاي مال العشرة دنانير يطشها والدينار اشكبره بذاك الوكت
على كل حال صفن اعياده ولكاله فتوى على قياسه
راح صرف العشرة دنانير كلهن دراهم مال قبل ابو الخمسين فلس
وجمع اولاده في البيت
ووقف على مكان عالي وولده جواه
وطش الواهليه
وكال ربي
هذا نذر عياده اله ولولاده
وجمع الدراهم من جديد ولم يخسر شي
ــ0ـ0ـ0ـ0ـ0ـ0ـ0ـ0ـ0ـ
انتهت الانخابات

في العراق الاف من امثال اعيادة ناذرين نذور حين يستلمون الكراسي
هسه هاي شنو انواع النذور محد يعرف لكنها ثكيلة حيل لان استلام الكراسي مو شوية وراه بلاوي وطلايب فحتما يراد نذر قوي ومعدل ومرتب
ـ0ـ0ـ0ـ0ـ0ـ0
يالله
كلمن للملم غراضة اقصد الكتل السياسية
ناس راحت غربا وناس شرقا وناس شمالا وناس جنوبا
على شنو
يردون يلكون فتوى لتحليل النذر بطريقة مرتبه على قياسه كل واحد يفصل بكيفه
لانه
يريد يستلم العراق
ويريد ايفصله على كيفه
يابه اعياده اشوكت توفي النذر
واقصد هنا اعياده كل الكتل السياسية الفائزة والخاسرة
كال اعياده
عمي اشدعوه مستعجل بعدنا ننتظر المحكمة الاتحادية بخصوص المقاعد التعويضية
خير ان شاء الله طلعت نتائج المقاعد التعويضية
يالله
يا اعيادة ما تشكل الحكومة
كال عمي انطوني مجال خلي ننتظر النظر في الطعون المقدمة من الكتل الفائزة والخسرانه على تزوير الانتخابات في بعض المحطات
خير ان شاء الله
طلعت النتائج مال الطعون يا اعياده ما تخلصنا
كال عمي انطونى مجال
خلي انشوف راي المحكمة الاتحادية ما المقصود
بالكتلة الاكبر
هل هي الفائزة باكبر عدد من الكراسي لو الاكبر اعضاء في البرلمان
خير ان شاء الله
مو طلع القرار مال المحكمة الاتحادية
يا اعياده ما تفضنا وتشكل حكومة
كال عمي على كيفيكم
خلي انشكل لجان للتفاوض مع الكتل الاخرى لتسمية رئيس الوزراء الجديد
خير ان شاء الله يااعياده
تشكلت اللجان
ها اعيادة وين وصلنا
عمي الكتله الفلانية اتريد توضع دراسة خاصة بالمواصفات الجديدة لرئيس الوزراء الجديد
يالله
هاي اشلون النوب بس احنا بالعراق هيجي اندور موديلات ومواصفات
خير ان شاء الله
يا اعياده طلعت المواصفات ايكولون ما تحجينا عليها
عمي هاي الكتل قدمت المواصفات الي وضعوها الهم خبراء من الخارج و الداخل
يعني اني اعرف اكو
منطقة كرادة خارج
ومنطقة كرادة داخل
هسه انته شدور على هاي السوالف خلي احجيلك المواصفات الي خلتها بعض الكتل السياسية
اولا
الكتله ـ0ـ0ـ0ـ0ـ0ـ0
تريد رئيس الوزراء ان يكون لاسني ولا شيعي ولا عربي ولا كردي ولا مسيحي ولا صابئي ولا شبكي ولا تركماني ولا ايزيدي ولا من الطوائف الاخرى
ويجب ان تتوفر فيه المواصفات التالية
اولا
طويل القامة لايقل طوله عن 190 سم
ثانيا
ان يكون شعر راسه لاابيض مشيب ولا اسود صبغ
ثالثا
لون البشرة ابيض
رابعا
العيون زرقاء
خامسا
قياس حذائه 43
سادسا
ان يقسم لنا باغلض الايمان
ان
اولا لايسرق من القاصة
ثانيا لايعين كل عشيرته حماية
ثالثا ان لايعين خوال الولد كلهم وزراء
ـــــــــــــــــــــــــــــــ

الكتلة ـ00ـ0ـ0ـ0ـ0
ان يكون رئيس الوزراء عراقي
وتتوفر به الشروط التاليه
اولا الطول مو مهم
ثانيا شعر راسه اسود من الله طبيعي مو صبغ وامسوي ماكير
ثالثا
لون البشرة حنطاوي
رابعا
العيون عسلية
خامسا
قياس حذائه
40
سادسا
ان يقسم باغلض الايمان
ان يدير باله على الي راح يوافقون عليه والشغلة
شيلني واشيلك
ـــــــــــــــــــــــــــــــــــــــــــ
الكتله 0ـ0ـ0ـ0ـ0
تريد ان يكون رئيس الوزراء شيعي سني مزدوج
وبنفس الشروط التي وردت في الكتله اعلاه
بس شغلة وزارة النفط ومنتوج النفط يقسم على الشكل التالي
تنكة اله وتنكة النا
وما علينا المن يريد يعين واشلون ايسوي التركيبة الوزارية
ــــــــــــــــــــــــــــــــــــ
الكتلة
0ـ0ـ0ـ0ـ0ـ0
ان يكون رئيس الوزراء من ابوين عراقين اصلا وفصلا وتايد المختار وشيخ عشيرته وشهادة الجنسية العراقية والجنسية والبطاقة التمونية واجازة السوق ودفتر الخدمة العسكرية
وان يقدم قبل كلشي
اشكد عنده قروش بالبنوك او البنك يعني اشكد رصيده الي كدام قبل كل شي
وينطينا سند الطابو مال البيت مالته
وجرد باسم عائلته ولحد الدرجة الرابعة وما يملكون
وان يختار الورزراء حسب الكفائة والشهادة مو الشهادة مال اكاديمية مريدي
وان يضع العراق والعراقين نصب اعينه
وان يكون همه الاول والاخير
النهوض بالعراق الى اشوية الي كدام منريد انكول ايصير مثل فلان دولة بلا حسد
يعني العراقي اشوية يرتاح
ان ينصف الشهداء بتكريم عوائلهم بحالة معيشية جيدة
انريد منه ان يكون منصف للفقراء
والايتام
ان ينصف السجناء السياسين
ان ينصف الارامل والايتام
ان يرجع الكهرباء يمعودين والله عيب
ان ايشوف النا حل مع دول الجوار في موضوع الماء
ان يفهم جوارينا من كل الجهات
امشي عليكم الحسين اتركونا بحالنا
هذه الشروط التي تطلبه القائمة
زين اشلون راح تتوفى النذور
بروح ابوك
اعياده دبرها وصرف العشرة دنانير وطشه فوك اولاده
هسه اشلون باعيادة
خلي ايشوفنا فد حل
واشلون مفكرين ايقسمون هل همبركراية باي طريقة
http://up.foraten.net/uploads/6fbd891c15.jpg
تقبلوا تحياتي

مع تحياتي وتقديري

والله يااخي العزيز صدقت بكل كلمة قلتها

يااخي والله ما صارت هاي سالفة الحكومة الجديده

كل يوم عذر وكل يوم سالفة تعبانه

وبالنسبة الهم الاجواء الان خوووووووووووووووووش ما شفط ولفط
والشفط والفط راح يضيع من تشكل الحكومه الي ما ادري شوكت تشكل
وراح تطلع الاعذار هذا الشفط والفط والخمط وين صار راح يكولون السبب الوضع الامني الي ما كانت بيه حكومه وكل ما انشكل الحكومه تفصل من الجوزه مال المولده

وماندري هاي الاموال والخيرات وين صارت

يمكن كاسبر اجه اخذه

شمدرينه احنا كنا ملتهين نفتر بالدول تقبلون انصير حكومه

من الله يطيح .................. اني اول مره اشوف حكومه تفتر بالدول يابه تقبلون بينه انصير حكام على العراق شوكت تصير عدكم شخصية وكرامه ماادري

ما تكعدون بالعراق وتقررون ........ شعدكم كل شويه بدوله
مثل ام البزازين كل ساعه بمكان
ولكم كافي عاد مو جيفتكم وصلت للمريخ


والله يااخي تعبنا من الحجي ومن سوالف هذوله السياسين والكتل والنواب الي نا يمين بالخضراء

يصير انفجار خابروا من هذوله النايمين بالخضراء وهو على السرير حطوله مايك كال استنكر

ورجع نام


ادعوا من الله العلي القدير ان يخلصنا من هذوله الحمران اهل الكروش



تقبل تحياتي

والله اني خايفة من نذر اعيادة مالتنة اخاف نذرة مولصالحنة

وراح يحد سجاجينة على هالشعب الفقير الى رافع ايدة

صارلة كم سنة يدعي ومحد اجة عندة ذمة وضمير يحكم

ولو بربع الحق

املنة بعيادة جبير وياربي الله يهدي علينةوميخلي عندة

عندة اولاد حتة ميطش عليهم ويلوحنة شي من النذر

موضوع هادف الى درجة لا توصف

كل الشكر والتقدير
تقبلوا مروري

اولا استاذنا الفاظل
تسلم على الطرح القيم وعلى الموضوع الجميل
وبالفعل متى يطش اعياده نذره
مو ملينا من هاي الكلاوات والمحاصصات على هل الكرسي المسخم
يريدون يبقو الوضع ملتهب نار ويتصرفون على كيفهم
وبالنسبه الحكومتنا نذرها الي يوصل
يعني كل اهله واقربائه والله بلشه ابتلينا
بهل الحكومات مال اخر موديل
الي هبة للشرق والغرب كلمن يدور على مصلحته ومافكر يوم بمصلحة شعبه
وطنه وهاي هيه
ويلا اعياده طش الواهليه
ترى ولدك تاهو عليه
ودي وتقديري لشخصك الكريم

.
يا ناس مصيبة مصيبتنا نحجي تفضحنا قضيتنا
نسـكت تكتـلنا علتنـا بس وين نولي وجهتنا
دلينـا يـادكتـور

جهل - احتلال - حرامية - قتلة - منافقين الخ من الامراض في المجتمع و صوتك يامواطن ياابو العائلة يامسكين ترس جيوب الحرامية و المنافقين

والله يابو الغيث انا بس اتمنى انه واحد من ذولا الي اجتهم السلطة بهذه السهولة التي لم يكونوا يحلومون بها ان يستثمرونها لخدمة العراقيين حتى يتم اعادة انتخابهم

يعني جمع مليون, مليار و بعدين؟
مرتاح باله؟ ينام ليله و هو شبعان و ملايين الفقراء في العراق الغني ينامون جياع في بيوت من طين لا ماء و لا كهرباء و لا خدمات

... اتفقوا على ان يعيش المواطن العراقي في رفاهية و حياة كريمة و ان يكون محترم من باقي الدول لاجيال تفتخر بكم يامن وقع لكم صوت المواطن.

ارق التحيات

استاذنا العزيز
طرح جميل لموضوع مهم
ولكن لااعتقد ان عياده راح يجرؤ ويقرر يوفي النذر او لايوفيه لانه مسكين لاحول له ولاقوه
ان اغلب سياسيينا كمسرح الدما
صحيح يتحرك
صحيح له صوت
ولكنه تحركه ايادي خلف الكواليس
ان امتنع سحبوا البساط
وان وافقهم صار رصيده بمصارف الخارج توب
وبالنسبه للهمبركر
اعتقد تقسمت من زمان
وجماعة دول الجوار والسياسيين كل واحد اخذ حصته حسب دوره
اللي اخذ له لقمه جبيره
واللي زغيره
واللي لملم من الوكع منها
واللي بس يباوع وينتظر تجي وحده غيرها ويكللهم بكلبه
اصبروا شوفوا شلون راح اكون بالصفقه الجايه
لان ماشاء الله العراق كل يوم تعقد عليه الصفقات
وسياسيينا باعوا العراق اكثر من مره
والى اكثر من جهه
شكرا على هذا الموضوع
تقبل مروري

السلام عليكم ورحمة الله وبركاته
اخي الغالي ابو الغيث المحترم
ان ماتفضلت به هو عين الصواب وكلام واقعي
ولاكن ماالحيلة في الامر
كلما نرى ضوء يلوح في الافق ويبشر بخير
وانتهاء المشاكل .. يأتي السياسيون وكما هو معتاد
ليضعوا العراقيل والمشاكل كي لايتحقق هذا الشئ
السؤال الذي يطرح نفسه بقوة
هل هولاء الساسة هم لايودون وصول البلد لحالة من الامن والاستقرار؟؟
ام ان مصالح الجميع تعترض العمل بشفافية ومهنية واخلاق متعارفة؟؟
لقد طفح الكيل ولم نعد نبني اي امال على كل سياسي بهذا البلد
لماذا الجميع تنادي بالمصالح الشخصية والفئوية
لماذا لم يرتقوا باانفسهم الى مانطمح اليه نحو العراقيون؟؟
وهل احلامنا وتطلعاتنا نحن كعراقيون هي كبيرة ومعقدة وتحتاج
الى معجزة في تحقيقها؟؟ اتصور مطالب الشعب العراقي مشروعة
وهي ايجاد حكومة وطنية تلبي رغبات هذا الشعب الصابر المحتسب والتعامل مع ابناء هذا الوطن على مبدا الوطنية الحقة
وليس على مبدا التخندقات الطائفية والعرقية والفئوية
والمناطقية الضيقة التي يعشقها ساسة العراق الجديد؟
ان رغباتهم تصطدم مع رغبات وتطلعات العراق
والعراقيون
لقد انعدمت فيهم النوايا الحسنة ولم يعد احد منهم قادرا
على تفهم مشاعر هذا الشعب
لقد اعمتهم مناصبهم ونفوذهم وتطلعهم
وجعلتهم يتصرفون بما لاينسجم مع الذوق العام
والعرف العام والخلق العام... والسؤال الذي اتسائل به
مع نفسي دائما ؟؟ هل هولاء يحققوا لنا الاحلام والمطالب والاماني العريضة
كلا ثم كلا؟؟ انهم اضعف وادنى واصغر من كل المطالب والامنيات والتطلعات التي ينظر اليها الشعب
العراقي الصابر المحتسب
وكما يقال
(فاقد الشئ لايعطيه)
فهولاء فاقدون للرحمة فيما بينهم وفاقدون للانسجام
وفاقدون للمصداقية وفاقدون لكل الايجابيات التي تمت للبشر كبشر
وللدين كدين..
فكيف يعطونا فيما هم ليس اهلا له؟؟؟
والله ارحم الراحمين