أمــــــــــي
امي الليل جفها ايذب ستر عالناس
ومن تطلع شمس نندل رسمها
وامي لسان كلبي ويحجي بس وياي
ابكثر دكاته اسمعه يكَول اسمها
وامي العوز هدها وسطر خدها الضيم
ماشافت فرح والهم حرمها
خطيه شكد فقيره شكد بسيطة حال
ودمعتها شكثر طفت نجمها
وامي شكثر طيبه شكد عليها تموت
طيبتها وعليها تموت طيبتها
شيلتها صرايف تارسه الكَيعان
وتغسل كل ذنب من تطوي شيلتها
واذا خطار مرنه وضيف وكت العوز
تعجن ثوبها وتخبز عبايتها
ملامحها الحزن من عدها تقره هموم
ومن يوم الصرت ماشفت ضحكتها
وامي الفجر تدعي اتصير كلها جفوف
توصل للسمه من اتطيح دمعتها
صفنتها قصيده اتشيل خلكَ الناس
والدنيه شكبرها اتصير صفنتها
شمس تمحي الضلام وفجر يطوي نجوم
شيلتها وحزن عاشور عفتها
وامي الفاتحه وياسين والتكوير
والقران كل اسراره شلتها
فطريه الثقافه الهور مصدر نور
بس ضبط العكال تشوف ركعتها
وامي جفوف اديها العوز خله اثار
وماكدرت جفوف العوز تلويها
الدنيه وكلشي بيها من الجبل للماي
بأصبعها وعشر مرات تطويها
وامي عيون امي شكد عليه تخاف
اروح تصيح كلبي ايسولف عليها
اجيت شلون اجيت وبس كلت جوعان
ذبت روحها وصبتلي اديها
ذبت روحها وصبتلي اديها
