غير اكعد راحه وابطل من سوالفي ..
لكن ابو طبع مايبطل طبعه ..
هسه ماعلينا .. خل اسولفلكم هاي السالفه .
البارحه رجعت ابحوش بكتبي القديمه .. وهم ماجزت ورجعت فتحت كتاب الف ليله وليله ... وتتذكرون ذيج المره
حلفت ما ارجع لهذا الكتاب .. لكن حنثت بيميني ورجعت .. المهم ومخلص الحجي ..
طلعلي شهريار نافخ روحه وكاعد على سرير الحكم والمكروده شهرزاد كاعده جوه رجليه ..
http://www.aleppos.net/forum/attachm...2&d=1189794613
سلمت عليهم ... شهرزاد باوع عليه بعين غضب
وشهرزاد تغنجت وتموعت وردت السلام : هلـــــــــــــــو عمو طركاعه
http://1.bp.blogspot.com/_J5i68ZtKXS...erazade_bg.jpg
وجان تغمزلي من جوه ليجوه ... آني كلت شبيها هاي المكموعه .. اليوم تغامز ..
ردت غمزت بعينها وهزت براسها على شهريار ..
آني افتهمت شنو السالفه ... اثاري تكولي زحلكه لشهريار ...
والله اني فكرت .. فكرت .. كلت شلون ازحلكه هاللزكه هذا ... تالي اجت براسي فكره ..
قلت : ياجماعه تدرون اني ليش اجيت عليكم .؟
شهرزاد : ليش اجيت .؟
طركاعه : سمعت اكو مفخخه بالقصر .
وجان يطفر شهريار من مكانه .. ويصيح : ياستار ياربي .. مفخخه ... اكوم ادخل للملجأ مالي ومن تتخلصون منها صيحولي ..
وطلع ركض من الغرفه ..
شهرزاد : الف رحمه لوالديك عمي .. خلصتني من هذا منعول الوالدين ... والله دمرني ... سولفيلي .. سولفيلي ..
عبالك اني مكينه مال سوالف ... وبس اسكت شويه .. يمد ايده عالسيف .
دمرني هالملعون الوالدين .
طركاعه : اي متعرفيه . شقاوه مال تالي وكت .. وكدرته بس عالنسوان هسه معلينا ...
يابه تره اني اجيتج بشغله .
- كول عمي .. بس لا هم تريد اقصلك قصص الف ليله وليله .
- لا شهرزاد .. ياقصص .. يابطيخ .. احنا عدنا ستلايت ومسلسلات مدبلجه وكل مسلسل عالف الف قصه من قصصج ..
بس آني اجيت لأن ادري بيج تفتهمين بالسياسه .. وتعرفين الاشخاص من كلامهم .. يعني تكدرين تميزين بين الصادق والكاذب ..
وهالأيام كثرت عدنا الدعايات الانتخابيه والمرشحون ديثردون براسنا .. واريد اعرف راسي من رجليه .. اخاف انتخب واحد وتطلع كل شعاراته اكسباير ..
يعني على كد ايام الانتخابات بس ..
شهرزاد : اها .. هسه تريد اعرفلك الزين من الموزين .. ؟
طركاعه : اي والله يابنيتي ..
شهرزاد : بسيطه عمي .. احجيلي عن مواصفاتم وآني اختارلك واحد منهم ..
طركاعه : عمي .. الاكثريه لابسين قوط واربطه ... ولحاهم خفيفه ..
وقسم لا بسين عمايم .. شي بيض .. شي سود .. ولحاهم طويله . وتارسين ايديهم محابس .
بعضهم ينادون بالعلمانيه والآخرين ينادون بالدين ..
العلمانيون : لا يخدم العراق الا نظام علماني ويجب فصل الدين عن السياسه
المتدينون : الدين هو اساس التشريع ولا يمكن ان تسير العجله الا بوجود الدين في كل مفاصل الحياه .
وقسم آخر ينادي : لا للبعث .. لايمكن ان يعود حزب البعث الى الحكم مره اخرى من خلال رجاله وازلامه السابقين .
قسم آخر يصيح : صناديق العراق هي الفيصل .. دعوا الجميع يشتركون في العمليه السياسيه والناخب هم من يختار ..
واعلاناتهم هي : لا للبطاله .. نفط الشعب للشعب ... نبني لكم مدارس
ومستشفيات ومجمعات سكنيه .. نصلح لكم الكهرباء ومجاري الصرف الصحي ... سنخصص رواتب للأرامل والأيتام والعاجزين . سنجعل العراق في مصاف الدول المتقدمه تكنلوجياًً .
ويا شهرزاد عالكه وصايره خوجه علي ملا علي .. دخنا ودوخنا العالم ويانا ..
شهرزاد تضحك حتى تستلقي على قفاها من الضحك وتقول : عمي سهله هاي .. عبالي فد شي صعب . ومتعني عليه وجاي مناك لهنا .. اصلاً شغلت ذوله المرشحين كلش سهله .
طركاعه : يرفع حاجبيه تعجباً : اذا هاي سهله .. لعد الصعبه شلونها .
شهرزاد : هسه اصيحلك المارد مال المصباح وادزه للعراق واخلي يشوف مرشحيكم ويختبرهم على طريقه الخاصه ويجيبلنا الأخبار .
طركاعه : اي رحمه لوالديج .. خوش فكره ..
شهريار من داخل سردابه : ها .. فككوها للمخخه لو بعد .؟
شهرزاد : شوف هذا الجبان ابو طكعه . صدك ولسه نايم بحفرته ..
شهرزاد تجيبه : لا حبيبي شهريار .. لسه بعدها .. خابرنا عالدفاع المدني ومنتظريهم يجون يفككوها ..
شهرزاد : من تخلصون عود انطوني خبر .. راح اختنك جوه ..
شهريار بصوت هامس : وخنكتهم .. عساك ماطلعت .
تفرك المصباح ويظهر المارد : شبيك لبيك عبدك بين ايديك .
http://www.aleppostudents.com/jojo21...ddin-Genii.jpg
طركاعه: اشكد عتيك هذا المارد .. لسه يصيح جبيك لبيك .. خفى
هالشكل . لك اثول روح لبغداد وشوفلنا يامرشح براسه خير حتى ننتخبه .
يلا ولي بسرعه .. مو تمطمط بالدرب وكلما تشوف وحده حلوه تظل
تسولف وياها .. يلا بالعجل كبل لايطلع هذا شهرزاد ..
المارد : امرك مجاب ياطركاعه . لحظات واعود اليكم ..
يتحول الى دخان بنفسجي ويتبخر في الهواء .
ويمر الوقت ... ويصيح الديك معلناً قرب حلول الفجر
http://www.moveed.com/data/media/128/birds-2.jpg
شهرزاد تنظر من النافذه بانتظار قدوم المارد
http://www.almouhytte.com/images/normal6.jpg
طركاعه : شو هذا تأخر .. ؟
شهرزاد : عمي انتظر .. مو تدري هذا طول عمره مسجون بالمصباح . ميصدك يحصله فرصه حتى يفلت شويه .. خطيه انطيه مجال
طركاعه : امرنا لله .. ننتظر ..
بعد انتظار طويل عاد المارد وحاله مقلوب عالآخر
http://www.heart-valve-surgery.com/I...ie-aladdin.jpg
وهو يضحك بهستيريه وعصبيه . واحياناً يبكي بوجع والم .
طركاعه : لك هاي شبيك .. خير خو ماصارلك شي ..
شهرزاد : يمعود .. هاي شجاك .. دحجيلنا شكو ماكو ..
المارد : شحجيلكم .. سوده بوجهي على هالسفره . اول مانزلت طكت بوجهي مفخخه ..
هم زين ختلت ورا صبة كونكريت وربك سلمني منها ..
ورا ساعه طكت متفجرات على مقرات احزاب مرشحه للأنتخابات
وهم راح بيها جم واحد ..
http://www.up.qatarw.com/get-2-2010-7bzunzfq.jpghttp://www.up.qatarw.com/get-2-2010-942q3xo9.jpg
طركاعه : لك هاي نعرفها ...
احنا دزيناك حتى تشوف المرشحين وياهو الكفوء بيهم .
المارد : شوفوا خل احجيلكم الزبده ..
( يلتفت الى شهرزاد ) عمي دعايات ذوله المرشحين مثل قصص شهرزاد
بالف ليله وليله ..
وانتوا افتهموها عاد ..
اودعناكم
تحول الى دخان ودخل في المصباح . وتركني مع شهرزاد في حيره من امرنا .
شهرزاد يخرج من حفرته متثائباً : ايباه شلون حلم .. حلمت طركاعه جاي علينا ويقول اكو مفخخه بالقصر ..
اكول شهرزاد هاي اني شدخلني بالحفره ..؟
شهرزاد : تصفق بكفيها وتغم شهرزاد بوجهه .. اومداك يا اغبر ..
عبالي رجال من صدك .. بس سمعت بالمفخخه انهزمت بالنكره مالتك .
لعد لو جاييك الامريكان شجان سويت .؟
طركاعه
18/2/2010
