الوطن للشاعر صادق الجبوري
اذا ابــــــدي وخلي وياك مقياس صدك ما وطــن ياخــذ قياســــك
واذا احجي وقيس بغيـرت الناس ابد ما غيرة وصلت مثل ناســـك
اذا انت وطــــن متكفلــــه عباس واجب كل شريف يبوس راســـك
****ــــــــــــــــــــــــــــــــــــــــــــــ ـ****
اشوفك ياوطن بس ما اشوفــــك لان عيني بعد ما ترغب اتشــوف
اشوفك بالكلب مرســــوم يعراق وماشوفــك وطن مديت الاجفوف
ما شوفك وطن طخ هامه مذلول بس شفتك الكعبة وغيرك يطوف
ظـــل شامخ نذرلك جفــه عباس يالكاعك الجربة وخصمك سيـوف
****ــــــــــــــــــــــــــــــــــــــــــــــ ـــ****
وجيرانك كبل مربيهم الجـــوع وعليهم فاض خيرك ما تأجـــل
والحلــوك الكبل تطعمها يعراق هي اول احلوك تصيح محتــــل
وانت بلا فخــر مهما يكــولـون النقص بيهـم يضل وانت تكمـل
عيني بلا نظـــر لاكــــن ترا بك
لان مرود كحلــــها مـــن ترابك
واجب يا وطــــن افخـــر ترابك
واكـــول اني عــراقي الهويــــة
يا جـوشن حسين ودرع عباس ياصبر العقيلة اللـــوة المحمـــل
يا وصــلة محنة وبيها ملفــوف عبد الله الرضيــــع الي تجنــدل
ياموطن شرف وحجية للكــون صدكني الشرف بس بابك انـدل
وجيرانك مناجل وانت محصـول وكبل موعد حصادك اجه المنجل
أكتب مـن دمـع عيني مــدادك
فضلك بالعلـــم وذكــــر مدادك
ســورك يا وطـن شامخ مدادك
يهد يا موطني اركــــان الوطية
العرب تربت صبخ ميفيده السيـــل وانته بكاع صبخة تريد تشتـــل
امس جفك يرد صطـرات اليهـــود وامس باقي العروبة بظله تختل
وعلى باب الـــدول كتبــو شعـارات ممنـــوع العراقي علينة يدخـــل
واجو بسم العروبة وياعرب هــاي يمد ايدة علجيبك قصدة ينشــــل
وغيرك من اغـــربل بيهـــم اسنين بس انت تظــــل وكلــها تنـــزل
